Тошкент, Ўзбекистон — Фарғона вилоятида 5–6 октябрь кунлари Ўзбекистон Республикаси ва Россия Федерацияси ҳудудлари Кенгашининг учинчи йиғилиши бўлиб ўтади. Форум тадбирлари «Фергана Экспо» халқаро кўргазмалар мажмуаси ва IT Park майдонларида ўтказилади.
Йиғилиш Ўзбекистон ва Россия ҳудудлари ўртасида, шунингдек, икки мамлакат ишбилармон доиралари ва тармоқ ташкилотлари ўртасида тўғридан-тўғри ҳамкорликни кенгайтириш, янги инвестиция ва кооперация лойиҳаларини ривожлантириш масалаларига бағишланади.
Форум доирасида «Ўзбекистон–Россия» ва «Россия–Ўзбекистон» Ишбилармонлик кенгашларининг 12-қўшма йиғилиши бўлиб ўтади. Дастурдан саноат кооперацияси, транспорт ва логистика, энергетика, агросаноат мажмуасидаги ҳамкорлик ҳамда маданий-гуманитар алоқаларга бағишланган бешта панель сессияси ҳам ўрин олган.
Дастурнинг алоҳида қисми Ўзбекистон ва Россия ишбилармон доиралари вакиллари иштирокида бизнес алоқалар биржаси бўлади. Учрашувларда томонлар ўзаро манфаатли бўлган янги лойиҳалар ва ташаббусларни кўриб чиқади.
Фарғонада, шунингдек, икки мамлакат ҳудудларининг иқтисодий, саноат ва инвестиция салоҳияти намойиш этиладиган кўргазма ташкил этилади.
Бундан ташқари, форум доирасида «Ўзбекистонда Сибирь кунлари» тадбирлари ўтказилади. Уларнинг дастури ҳудудлараро иқтисодий ва маданий алоқаларни янада ривожлантиришга қаратилган.
Ҳудудлар Кенгашининг учинчи йиғилиши саноат кооперацияси ва инвестициявий ҳамкорликни кенгайтириш, транспорт-логистика алоқаларини ривожлантириш, энергетика ва агросаноат секторида қўшма ташаббусларни амалга ошириш учун қўшимча имкониятлар яратиши кутилмоқда.
Форум, шунингдек, Ўзбекистон ва Россия ҳудудлари ўртасида тўғридан-тўғри ва узоқ муддатли алоқаларни мустаҳкамлаш учун майдон бўлиб хизмат қилади.