Тошкент, Ўзбекистон — Ўзбекистонда атмосфера ҳавосини муҳофаза қилиш ва ифлосланиш даражасини пасайтириш бўйича чора-тадбирлар кенгайтирилмоқда.
Бу борада амалга оширилаётган ишлар ва «Тоза ҳаво» умуммиллий лойиҳасининг ижроси ҳақида Президент Администрацияси ҳузуридаги Оммавий ахборот воситалари учун контент тайёрлаш марказида ўтказилган матбуот анжуманида маълумот берилди.
Тадбирда Миллий экология ва иқлим ўзгариши қўмитаси, Экополиция, Гидрометеорология илмий-тадқиқот институти ҳамда экологик тизимнинг бошқа ташкилотлари вакиллари иштирок этди.
Экология қўмитаси маълумотларига кўра, I–II тоифадаги саноат корхоналарида 459 та автоматик мониторинг станцияси ўрнатилган. Тошкент шаҳрида 554 та корхона инвентаризациядан ўтказилган, 67 та корхонада эса 186 та чанг-газ тозалаш қурилмаси модернизация қилинган.
Ишларнинг алоҳида йўналиши автомобиль транспорти билан боғлиқ. 280 мингдан ортиқ транспорт воситаси экологик назоратдан ўтказилди. Натижада, идора маълумотларига кўра, 2,52 минг тонна зарарли моддалар чиқиндиларининг олди олинди. Республика бўйича 2,2 миллиондан ортиқ экологик стикер ҳам берилди.
«Автомобилсиз кун» акцияси доирасида ўртача суткалик чиқиндилар ҳажми қарийб 50 тоннага камаймоқда.
Тошкент шаҳрида 10 та нуқтада PM2.5 миқдорини аниқлаш учун намуналарни автоматик йиғиш йўлга қўйилди. Бундан ташқари, «Эко-назорат» онлайн платформаси ишга туширилди.
Экологик талаблар қурилиш соҳасига ҳам татбиқ этилмоқда. Баландлиги 12 метрдан ортиқ ёки майдони 500 квадрат метрдан зиёд бўлган объектлар ҳудудининг камида 30 фоизини кўкаламзорлаштириш талаби белгиланди.
Тошкент ва Сирдарё вилоятларида 330 гектар майдонда «яшил белбоғ» барпо этилмоқда. Яна бир лойиҳа — узунлиги 33 километр бўлган Кичик ҳалқа йўли бўйлаб «Яшил коридор» ташкил этиш.
Тақдим этилган маълумотларга кўра, 2026 йил 1 январдан 21 сентябргача Тошкент шаҳрида PM2.5 майда дисперсли заррачаларининг ўртача концентрацияси 2025 йилнинг шу даврига нисбатан 25 фоизга камайган.
Миллий стандарт мезонларига кўра, ҳаво сифати яхши бўлган кунлар сони 81 тадан 147 тага етган. Бундан ташқари, 18 апрелдан 17 майгача пойтахтда ҳаво сифати 30 кун давомида узлуксиз яхши даражада сақланган.
Матбуот анжуманида Қўмита вакиллари журналистларнинг аввал ўтказилган рейдлар, автомобиль транспорти чиқиндиларини камайтириш чоралари, автоматик мониторинг станцияларининг мавжуд эмаслиги ёки улардан талаб даражасида фойдаланилмагани учун жавобгарлик, шунингдек, амалга оширилаётган ва режалаштирилаётган экологик чора-тадбирлар ҳақидаги саволларига жавоб берди.
Экология қўмитаси 2026 йил охирига қадар ифлослантирувчи моддалар ва транспорт чиқиндиларини 2 фоизга қисқартириш, PM2.5 меъёридан ошган кунлар сонини 7 фоизга камайтириш, қурилиш объектларининг 40 фоизини чангни босиш ва мониторинг тизимлари билан таъминлаш ҳамда саноат корхоналарининг 30 фоизини модернизация қилишни режалаштирмоқда.