Тошкент, Ўзбекистон — Astana Hub, IT Park Uzbekistan ва Eurasia Growth Hub Қозоғистон ва Ўзбекистон технологик компанияларининг халқаро бозорларга чиқиш имкониятларини кенгайтириш бўйича келишувга эришди.
Ҳамкорлик меморандуми AI & Digital Bridge 2026 халқаро технологик форуми доирасида имзоланди. Ҳужжатни Astana Hub бош директори Магжан Мадиев, IT Park Uzbekistan бош директори Азамат Караматов ва Eurasia Growth Hub CEOси Музаффар Карабаев имзолади.
Ҳамкорлик доирасида томонлар қўшма технологик форумлар, вебинарлар, бизнес-миссиялар ва B2B учрашувлар ўтказиш, шунингдек, Қозоғистон ва Ўзбекистон стартап экотизимлари ўртасидаги ҳамкорликни мустаҳкамлашни режалаштирмоқда.
Асосий йўналишлардан бири компанияларга хорижий буюртмачилар, стратегик ҳамкорлар, реселлерлар, тизим интеграторлари, инвесторлар ва акселераторлар билан алоқа ўрнатишда кўмаклашиш бўлади.
Eurasia Growth Hub кўмагида Қозоғистон ва Ўзбекистон стартапларининг Буюк Британия ҳамда бошқа хорижий бозорларга чиқишига алоҳида эътибор қаратиш режалаштирилган. Ҳамкорлар, шунингдек, хорижий бозорларни ўрганиш, бизнесни ривожлантириш ва операцион масалаларни ҳал қилишда ёрдам беришни ўз ичига оладиган soft landing механизмларини яратиш имкониятини кўриб чиқади.
«Қозоғистон ва Ўзбекистонда кучли технологик жамоалар ва иқтидорли тадбиркорлар бор. IT Park Uzbekistan билан биргаликда биз уларга халқаро бозорларга чиқиш, мижозлар ва ҳамкорлар топиш, маҳсулотларини ривожлантиришда ёрдам беришни истаймиз. Икки экотизим ва халқаро ҳамкорларимиз имкониятларини бирлаштириш орқали минтақа компанияларининг кўпроқ қисми ўз бозорларидан ташқарида ҳам масштаблашиши учун шароит яратмоқдамиз», — деди Магжан Мадиев.
Азамат Караматовнинг сўзларига кўра, ҳамкорлик икки давлат технологик компанияларига мижозлар ва ҳамкорларни излаш, шунингдек, инвестициялар жалб қилиш учун янги имкониятлар тақдим этиши керак. У, шунингдек, сунъий интеллект ҳамда тадқиқот ва ишланмалар соҳасидаги қўшма ташаббусларнинг истиқболларини қайд этиб, улар глобал бозорга мўлжалланган маҳсулотларни яратишга кўмаклашиши мумкинлигини таъкидлади.
Музаффар Карабаев Eurasia Growth Hub стартапларга ўз ечимларини хорижий бозорлар талабларига мослаштириш ва зарур бизнес алоқаларини йўлга қўйишда ёрдам беришини таъкидлади. Унинг сўзларига кўра, хаб платформаси орқали жамоалар амалий кўмак олиши ҳамда бозорни ўрганишдан потенциал мижозлар ва ҳамкорлар билан музокараларга ўтиши мумкин.
Меморандум, шунингдек, сунъий интеллект ҳамда тадқиқот ва ишланмалар соҳасида қўшма ташаббусларни назарда тутади. Томонлар билим алмашиш, пилот лойиҳалар ва менторлик дастурларини амалга ошириш, шунингдек, технологик компанияларни илмий ва таълим ташкилотлари билан ҳамкорлигини ривожлантиришни режалаштирмоқда.
AI & Digital Bridge 2026 форуми Қозоғистонда Рақамлаштириш ва сунъий интеллект йили доирасида ўтказилди. Форум сунъий интеллект, рақамли технологиялар, тадбиркорлик ва инсон капиталини ривожлантириш соҳасидаги ташаббусларни бирлаштирувчи тадбирлар ойлиги — AI MONTHнинг асосий халқаро тадбири бўлди.