Тошкент, Ўзбекистон — Ўзбекистонда 4,8 миллион нафар аҳоли кўп қаватли уйлардаги квартираларда истиқомат қилади. Бу маълумотлар аҳоли ва қишлоқ хўжалигини рўйхатга олишнинг дастлабки якунларида келтирилган.
Рўйхатга олиш маълумотларига кўра, квартираларда яшовчилар мамлакат умумий аҳолисининг 12,4 фоизини ташкил этади.
Аҳолининг асосий қисми — 33,3 миллион нафар ёки 85,3 фоизи — якка тартибдаги турар жойларда истиқомат қилади.
Яна 927,3 минг нафар киши, яъни аҳолининг 2,3 фоизи бошқа турдаги турар жойларда яшайди. Бу тоифага дала ҳовлилари, талабалар ва ишчилар ётоқхоналари, меҳмонхоналар ҳамда бошқа яшаш жойлари киради.
Шундай қилиб, Ўзбекистон аҳолисининг яшаш таркибида якка тартибдаги турар жойлар устунлиги ҳануз сақланиб қолмоқда.