Тошкент, Ўзбекистон — 2 июль куни пойтахтимиздаги Инсон ҳуқуқлари уйида хотин-қизларда етакчилик кўникмаларини ривожлантиришга қаратилган икки кунлик тренинг бошланди. Машғулотлар Инсон ҳуқуқлари бўйича Ўзбекистон Республикаси Миллий маркази томонидан ЕХҲТнинг Ўзбекистондаги лойиҳалари мувофиқлаштирувчиси, Ўзбекистон Республикаси Оила ва хотин-қизлар қўмитаси ҳамда Ҳуқуқни муҳофаза қилиш академияси билан ҳамкорликда ўтказилмоқда.
Мазкур тадбир хотин-қизларнинг мамлакат ижтимоий-сиёсий ҳаётидаги ролини янада мустаҳкамлаш, уларнинг қарорлар қабул қилиш жараёнларидаги иштирокини кенгайтириш, шунингдек, давлат органлари, ҳуқуқни муҳофаза қилиш ва суд тизимларида фаолият юритаётган хотин-қизларнинг касбий маҳорати ва бошқарув салоҳиятини оширишга қаратилган.
Тренинг Ўзбекистоннинг гендер тенгликни таъминлаш, хотин-қизларнинг ҳуқуқ ва имкониятларини кенгайтириш борасидаги давлат сиёсатини изчил амалга ошириш ҳамда мамлакатнинг инсон ҳуқуқлари соҳасидаги халқаро мажбуриятларини, жумладан, Хотин-қизларга нисбатан камситишнинг барча шаклларига барҳам бериш тўғрисидаги конвенция, БМТнинг Барқарор ривожланиш мақсадлари ва 2030 йилгача гендер тенгликка эришиш стратегияси қоидаларини бажариш доирасида ташкил этилди.
Иштирокчиларга Инсон ҳуқуқлари бўйича Ўзбекистон Республикаси Миллий маркази директори Акмал Саидов, Инсон ҳуқуқлари бўйича Ўзбекистон Республикаси Миллий маркази директори ўринбосари Дилноза Муратова, ЕХҲТнинг Ўзбекистондаги лойиҳалари мувофиқлаштирувчиси Антти Карттунен, Ўзбекистон Республикаси Бош прокурорининг ўринбосари Светлана Артикова ва Ҳуқуқни муҳофаза қилиш академияси бошлиғининг биринчи ўринбосари Евгений Коленко табрик сўзлари йўллади.
Улар ўз нутқларида хотин-қизларнинг етакчилик салоҳиятини мустаҳкамлаш инклюзив ва самарали давлат бошқаруви тизимини барпо этиш, аёллар ва эркакларнинг ижтимоий ҳаётда тенг иштирокини таъминлаш, шунингдек, тенглик ва камситмаслик тамойилларини янада илгари суришнинг муҳим шарти эканини таъкидладилар.
Тренинг ҳуқуқни муҳофаза қилиш идоралари ҳамда гендер тенгликни тарғиб қилиш соҳасида кўп йиллик тажрибага эга бўлган халқаро экспертлар томонидан олиб борилмоқда. Улар орасида Буюк Британия полициясининг ўттиз йилдан ортиқ хизмат тажрибасига эга катта офицери, собиқ бош констебл ва қотилликларни тергов қилиш бўйича миллий мувофиқлаштирувчи Кейт Мейнелл ҳамда Барселона полицияси суперинтенданти, гендер тенглик масалалари бўйича йўналиш раҳбари ва Европа полициячи аёллар тармоғининг узоқ йиллик президенти Монтсеррат Пина ҳам бор.
Биринчи кун дастури асосий етакчилик компетенцияларини ривожлантириш, самарали мулоқот кўникмаларини шакллантириш ва касбий фаолиятда ўзига ишончни мустаҳкамлаш масалаларига бағишланди. Иштирокчилар етакчиликка замонавий ёндашувлар, қарор қабул қилиш жараёнларида аёлларнинг ўрни, шунингдек, касбий юксалиш йўлида юзага келадиган қийинчиликлар ва имкониятларни муҳокама қилдилар.
Ҳар бир иштирокчининг шахсий етакчилик салоҳияти, стратегик фикрлаш кўникмаларини ривожлантириш, жамоада самарали ҳамкорлик қилиш ва касбий муҳитда конструктив мулоқот ўрнатиш қобилиятини аниқлашга алоҳида эътибор қаратилди. Амалий машғулотлар бошқарув ва коммуникатив кўникмаларни такомиллаштиришга қаратилган интерфаол машқлар, гуруҳ муҳокамалари ҳамда тажриба алмашишни ўз ичига олди.
Биринчи куннинг якуний сессияси касбий алоқаларни ривожлантириш ва ўзаро қўллаб-қувватлаш механизмларини мустаҳкамлашга бағишланди. Иштирокчилар тажриба алмашиш асносида аёлларни раҳбарлик лавозимларига кўтаришнинг муваффақиятли амалиётларини муҳокама қилдилар ва келгусидаги ҳамкорлик йўналишларини белгилаб олдилар.
Тренинг 3 июль куни ўз ишини давом эттиради. Иккинчи кун давомида стратегик етакчилик, ўзгаришларни бошқариш, мураккаб шароитларда қарор қабул қилиш масалалари, шунингдек, гендер тенгликни илгари суриш ва аёлларнинг бошқарув жараёнларидаги иштирокини кенгайтиришнинг амалий механизмлари кўриб чиқилади.