Тошкент, Ўзбекистон — Саноат, радиация ва ядро хавфсизлиги қўмитаси Тошкент вилоятининг Зангиота туманидаги автомобиль газ тўлдириш компрессор шохобчасида содир бўлган портлашнинг дастлабки сабабини маълум қилди. Идора маълумотларига кўра, ҳодиса маиший газ баллонларини ноқонуний равишда тўлдириш вақтида хавфсизлик талабларининг қўпол равишда бузилиши оқибатида юз берган.
Қўмита маълум қилишича, 16 июль куни кечқурун Зангиота туманининг Эркин маҳалласида жойлашган автомобиль газ қуйиш шохобчасига олтита маиший газ баллонини олиб келаётган Labo автомобили кириб келган. Шохобча фақат транспорт воситаларини газ билан тўлдириш учун мўлжалланган бўлишига қарамай, унда қўлбола ўтказгич ёрдамида 100 литрли маиший газ баллонлари тўлдирилган.
Дастлабки маълумотларга кўра, учинчи баллон тўлдирилаётган вақтда шланг босимга дош бермай ёрилиб, уланиш жойидан чиқиб кетган. Шлангнинг қаттиқ юзага урилиши учқун ҳосил қилган ва шундан сўнг портлашлар ҳамда ёнғин содир бўлган.
Қўмитада таъкидланишича, ҳодисага штатда назарда тутилмаган ускуналардан фойдаланиш ва белгиланган хавфсизлик талабларининг бузилиши сабаб бўлган.
Ҳодиса оқибатида иккита газ баллони портлаган, яна тўрттаси ёнган ва жиддий шикастланган. Уч нафар инсон жабрланган. Улардан икки нафари ўртача оғирликда куйиш жароҳатлари олган, яна бир нафарнинг танасининг 80 фоизигача қисми куйган бўлиб, аҳволи оғир деб баҳоланмоқда. Барча жабрланганларга тиббий ёрдам кўрсатилмоқда.
Мазкур ҳолат юзасидан жиноят иши қўзғатилди. Портлаш ва ёнғиннинг барча ҳолатлари ҳамда якуний сабабларини аниқлаш учун комплекс экспертиза тайинланди.
Идора қўлбола қурилмалардан фойдаланиш ҳамда автомобиль газ қуйиш шохобчаларида маиший газ баллонларини тўлдириш тақиқланганини ва бу инсон ҳаёти ҳамда соғлиғи учун жиддий хавф туғдиришини яна бир бор эслатди.
Ҳодиса 16 июль куни соат 22:46 да Зангиота туманидаги автомобиль газ қуйиш шохобчаси ҳудудида содир бўлган. Аввалроқ шохобчада портлаш ва ёнғин юз бергани, оқибатда пропан сақлаш резервуари ҳамда уни ташишга мўлжалланган махсус автомобиль шикастлангани ҳақида хабар берилган эди.