Тошкент, Ўзбекистон — Ўзбекистон футбол бўйича U20 терма жамоаси AFC U20 China 2027™ Осиё кубоги саралаш босқичидаги рақибларини билиб олди. Расмий қуръа ташлаш маросими ОФК штаб-квартирасида, Куала-Лумпур шаҳрида бўлиб ўтди.
Ўзбекистон В гуруҳидан жой олди ва Сурия, Ҳиндистон ҳамда Бангладеш терма жамоаларига қарши баҳс олиб боради.
Турнирнинг саралаш босқичи 2026 йил 25 августдан 6 сентябргача марказлашган тизим асосида ўтказилади.
Жорий мусобақа Осиё футбол конфедерацияси томонидан ёшлар мусобақаларини ислоҳ қилиш доирасида тасдиқланган янги форматдаги илк турнир бўлади. Янги тизим икки босқичли форматни ва лига даражасини ошириш ҳамда тушириш механизмини назарда тутади.
Саралаш босқичида 32 та жамоа иштирок этади. Улар тўрттадан саккиз гуруҳга бўлинган. Гуруҳ ғолиблари ва иккинчи ўринни эгаллаган энг яхши етти жамоа мусобақанинг финал босқичига йўл олади.
Сўнгги ўринни эгаллаган жамоалар эса кейинги мусобақада Ривожланиш дивизионига ўтказилади.
AFC U20 China 2027™ Осиё кубогининг финал босқичи 2027 йил 24 мартдан 10 апрелгача бўлиб ўтади.
Қуръа натижаларига кўра, саралаш босқичи гуруҳлари қуйидагича шаклланди:
А гуруҳи: Жанубий Корея, Қирғизистон, Филиппин, Ливан.
В гуруҳи: Ўзбекистон, Сурия, Ҳиндистон, Бангладеш.
С гуруҳи: Эрон, Вьетнам, КХДР, Фаластин.
D гуруҳи: Иордания, Тожикистон, Баҳрайн, Афғонистон.
E гуруҳи: Саудия Арабистони, Қатар, Уммон, Гонконг.
F гуруҳи: Ироқ, Таиланд, БАА, Туркманистон.
G гуруҳи: Япония, Яман, Камбоджа, Қувайт.
H гуруҳи: Австралия, Индонезия, Малайзия, Лаос.
Шунингдек, янги формат доирасида 12 та жамоа иштирок этадиган Ривожланиш дивизиони ҳам ташкил этилади. Улар учта гуруҳга бўлинган.
Гуруҳ ғолиблари ва иккинчи ўринни эгаллаган энг яхши учта жамоа кейинги турнирнинг саралаш босқичига йўлланма олади.