Тошкент, Ўзбекистон — ICT WEEK Uzbekistan 2026 доирасида Ўзбекистон рақамли технологиялар вазири Шерзод Шерматов APT Satellite Company Limited (APSTAR) ижрочи директори ва президенти Ван Хунбин билан учрашди.
Томонлар сунъий йўлдош алоқасини ривожлантириш, телекоммуникация инфратузилмасини такомиллаштириш ва Марказий Осиёда ҳамкорликни кенгайтириш масалаларини муҳокама қилди.
Учрашувда Ўзбекистонда сунъий йўлдош алоқаси бозорини ривожлантириш истиқболлари, APT Satellite компаниясининг мамлакатдаги бизнес режалари, шунингдек, миллий телекоммуникация инфратузилмасини ривожлантириш учун компаниянинг амалдаги ва келажакдаги сунъий йўлдош ресурсларидан фойдаланиш имкониятлари кўриб чиқилди.
Музокараларнинг асосий натижаларидан бири Шерзод Шерматов иштирокида APT Satellite ва UZ-SAT ўртасида ҳамкорлик тўғрисидаги келишувнинг имзоланиши бўлди. Ҳужжат сунъий йўлдош алоқаси ва рақамли инфратузилма соҳаларида амалий ҳамкорликни ривожлантиришни назарда тутади.
Томонлар APT Satellite ва UZ-SAT ўртасидаги амалдаги ҳамкорлик ҳамда қўшма ишларнинг истиқболли йўналишларини ҳам муҳокама қилди. Хусусан, APT Satellite сунъий йўлдош ресурсларидан сунъий йўлдош алоқаси хизматлари, кенг полосали интернетга уланиш, телевидение ва радиоэшиттириш, шунингдек, бошқа телекоммуникация ва рақамли хизматларни кўрсатиш учун фойдаланиш масалалари муҳокама қилинди.
APT Satellite вакиллари компаниянинг сунъий йўлдошлар гуруҳини янада ривожлантириш ҳамда замонавий технологиялардан фойдаланган ҳолда янги аппаратларни учириш режалари билан таништирди.
Учрашув якунида сунъий йўлдош ресурсларини кенгайтириш Марказий Осиёда сунъий йўлдош алоқасини ривожлантириш ва тегишли хизматлар сифатини ошириш учун қўшимча имкониятлар яратиши таъкидланди.
Шунингдек, минтақада сунъий йўлдош инфратузилмасини янада ривожлантириш, халқаро алоқа имкониятларини кенгайтириш ҳамда APT Satellite, UZ-SAT ва Ўзбекистон томонининг истиқболли қўшма лойиҳаларига алоҳида эътибор қаратилди.