Тошкент, Ўзбекистон — Ўзбекистон ва Австриянинг Bauer компанияси қишлоқ хўжалигида сувни тежайдиган технологияларни жорий этиш соҳасида ҳамкорликнинг янги босқичига ўтиш бўйича келишувга эришди.
Қишлоқ хўжалиги вазири Иброҳим Абдураҳмонов Bauer компаниясининг молиявий масалалар бўйича директори Андреас Шиттер билан учрашди. Томонлар ҳамкорликнинг жорий ҳолати ва кейинги ҳамкорликнинг истиқболли йўналишларини муҳокама қилди.
Ўзбекистон қишлоқ хўжалиги учун замонавий сув тежовчи технологияларни етказиб бериш масаласига алоҳида эътибор қаратилди.
Хусусан, томонлар замонавий ёмғирлатиб суғориш тизимларидан фойдаланиш орқали суғориш самарадорлигини ошириш, сув ресурсларини тежаш ва қишлоқ хўжалиги экинлари ҳосилдорлигини таъминлаш имкониятларини кўриб чиқди.
Учрашув якунлари бўйича «Ўзбекистон қишлоқ хўжалигида замонавий сув тежовчи технологияларни жорий этиш» лойиҳасининг иккинчи босқичи доирасида шартнома лойиҳаси имзоланди. Ҳужжат замонавий ёмғирлатиб суғориш тизимларини етказиб бериш ва тўлиқ ўрнатишни назарда тутади.
Қишлоқ хўжалиги вазирлигида таъкидланишича, сув ресурсларидан оқилона фойдаланиш ва замонавий технологияларни жорий этиш аграр соҳани ривожлантиришнинг устувор йўналишларидан бири ҳисобланади.
Bauer компанияси билан ҳамкорликнинг янги босқичи қишлоқ хўжалиги ерларини суғориш соҳасида хорижий тажриба ва замонавий ечимларни янада қўллашни назарда тутади.