Тошкент, Ўзбекистон — Ўзбекистонда 2026 йил январь–июнь ойларида барча молиялаштириш манбалари ҳисобидан асосий капиталга киритилган инвестициялар ҳажми 338,9 триллион сўмни ташкил этди. Бу ўтган йилнинг шу даврига нисбатан 17,5 фоизга кўп. Бу ҳақда Миллий статистика қўмитаси маълум қилди.
Молиялаштириш манбалари таркибида энг катта улуш хорижий инвестициялар ва Ўзбекистон давлат кафолатисиз жалб қилинган хорижий кредитлар ҳиссасига тўғри келди. Уларнинг ҳажми 235,6 триллион сўмни ташкил этган.
Корхоналарнинг ўз маблағлари ҳисобидан 38,6 триллион сўмлик инвестициялар ўзлаштирилди.
Ўзбекистон Республикаси давлат кафолати остида жалб қилинган хорижий кредитлар ҳажми 23,4 триллион сўмни ташкил қилди. Аҳоли маблағлари ҳисобидан 19 триллион сўм инвестиция йўналтирилди.
Республика бюджети ҳисобидан асосий капиталга инвестициялар учун 16 триллион сўм ажратилди.
Тижорат банклари кредитлари ва бошқа қарз маблағлари ҳажми 4,8 триллион сўмни, Тикланиш ва тараққиёт жамғармаси маблағлари эса 1,4 триллион сўмни ташкил этди.