Тошкент, Ўзбекистон — Хорватия Ўзбекистоннинг Загреб шаҳрида Миграция агентлиги ваколатхонасини очиш ташаббусини қўллаб-қувватлади.
Бу ҳақда агентлик директори Муҳсинхўжа Абдураҳмоновнинг Хорватия Ташқи ва Европа ишлари вазирлиги раҳбарияти билан ўтказган музокаралари якунлари бўйича маълум бўлди.
Янги ваколатхона Хорватияда бўлиб турган Ўзбекистон фуқароларига ҳуқуқий ва амалий ёрдам кўрсатиши кутилмоқда. Бундан ташқари, у Словения ва Сербия билан миграция соҳасидаги ҳамкорликни ривожлантириш учун мувофиқлаштирувчи марказ вазифасини бажариши мумкин.
Учрашув давомида томонлар давлатлараро дастурлар доирасида Хорватияга ишлаш учун бораётган Ўзбекистон фуқароларига виза ҳужжатларини расмийлаштириш жараёнини тезлаштириш имкониятларини ҳам муҳокама қилди.
Хорватия томони тегишли тартиб-таомилларни соддалаштириш бўйича амалий ечимларни топиш мақсадида консуллик муассасалари билан биргаликда ишлашга тайёрлигини билдирди.
Музокаралар якунида томонлар ҳамкорликни давом эттириш ва эришилган келишувларни амалий жиҳатдан рўёбга чиқаришга киришишга келишиб олди.