Тошкент, Ўзбекистон — Ўзбекистон Экология миллий қўмитаси Оҳангарон туманидаги чиқинди полигонида содир бўлган ёнғин оқибатида атмосфера ҳавоси ифлослангани учун давлат корхонаси Maxsustrans-ISHBга 683,87 миллион сўм миқдорида компенсация тўловини ҳисоблади.
Идора маълум қилишича, Экополиция мутахассислари 11–12 июль кунлари Тошкент шаҳри ҳавоси сифати ёмонлашиши сабабларини ўрганди. Текширув давомида 10 июль куни Оҳангарон шоссесининг 32-километрида, «Янгихаёт» посёлкасида жойлашган маиший чиқиндилар полигонида ёнғин содир бўлгани аниқланди.
Қўмита маълумотларига кўра, ёнғинга чиқиндиларни жойлаштириш ва кўмиш талабларига риоя этилмагани сабаб бўлган. Дастлабки текширувдан сўнг вилоят Экология бошқармаси ходимлари полигон раҳбари Р.Б.га нисбатан маъмурий баённома расмийлаштириб, ёнғинни бартараф этиш бўйича кўрсатма берган.
Такрорий текширувда қонунбузилишлар бартараф этилмагани, натижада ёнғин давом этгани маълум бўлди. Шу муносабат билан объект раҳбарига нисбатан Маъмурий жавобгарлик тўғрисидаги кодекснинг 91-моддаси 2-қисми асосида яна бир маъмурий баённома расмийлаштирилди. Мазкур модда чиқиндиларни йиғиш ва сақлашда табиатни муҳофаза қилиш талабларини бузганлик учун жавобгарликни назарда тутади.
Ҳаво лаборатория таҳлиллари бир қатор ифлослантирувчи моддаларнинг рухсат этилган энг юқори концентрацияси ошиб кетганини кўрсатди. Углерод оксиди миқдори меъёрдан 10,7 баробар, формальдегид 12,2 баробар, азот диоксиди 12,8 баробар, олтингугурт диоксиди 9 баробар, водород сульфиди эса 1,5 баробар юқори экани қайд этилди.
Қўмита маълум қилишича, 11 июль куни соат 20:00 дан кейин Тошкент шаҳрида шарқий ва жануби-шарқий шамол кучайиб, ўртача тезлиги секундига 5–8 метрни, айрим вақтларда эса 10 метргача етган. Шу вақтда мониторинг станциялари PM2,5 ва PM10 қаттиқ заррачалари концентрацияси ошганини қайд этган.
Ўтказилган тадқиқотлар якунларига кўра, Maxsustrans-ISHBга қўшимча равишда 683,87 миллион сўм миқдорида компенсация тўлови ҳисобланди. Ҳозирда судга мурожаат қилиш учун тегишли ҳужжатлар тайёрланмоқда.
Идора маълумотига кўра, Оҳангарон туманининг «Янгихаёт» маҳалласидаги чиқинди полигони 2021 йилдан буён қурилмоқда. Объект қурилиш ишлари тўлиқ якунланмагани сабабли ҳали фойдаланишга топширилмаган. Шунга қарамай, 2025 йил май ойидан бошлаб Maxsustrans-ISHB Тошкент шаҳридан маиший чиқиндиларни ушбу майдонга олиб чиқмоқда.