Тошкент, Ўзбекистон — Тошкент шаҳрининг Учтепа туманидаги кўп қаватли уй хонадонларидан бирида газ-ҳаво аралашмаси чақнаши оқибатида бир киши жабрланди.
Жабрланган шахс шифохонага ётқизилди. Бу ҳақда Тошкент шаҳар Фавқулодда вазиятлар бошқармаси матбуот хизмати хабар берди.
Ҳодиса ҳақидаги хабар Фавқулодда вазиятлар бошқармасига 5 ноябрь куни соат 10:00 да келиб тушган. Ҳодиса Чилонзор мавзесининг 23-даҳасида жойлашган уйлардан бирида содир бўлган.
Воқеа жойига етиб келган қутқарув бўлинмалари ёнғинни тезкорлик билан бартараф этди. Чақнаш оқибатида қўшни хонадоннинг эшик ва деразалари қисман шикастланган.
Айни пайтда мутахассислар ҳодиса сабаблари ва етказилган моддий зарар миқдорини аниқламоқда.
