Тошкент, Ўзбекистон —Ўзбекистонда 2030 йил 1 январдан бошлаб тиббиёт ва фармацевтика ходимлари ўз мутахассислиги бўйича профессионал фаолият билан фақат давлат рўйхатидан ўтгандан кейин шуғулланиши мумкин бўлади.
Давлат рўйхатидан ўтказиш беш йил муддатга амал қилади. Ушбу муддат тугагач, мутахассислар рўйхатдан ўтиш тартибини қайтадан ўташлари талаб этилади. Рўйхатдан ўтказиш тартиби Вазирлар Маҳкамасининг 2026 йил 19 октябрдаги 577-сон қарори билан тасдиқланган. Бу ҳақда Ўзбекистон Адлия вазирлиги хабар берди.
Ҳужжат тиббиёт ва фармацевтика соҳалари мутахассисларини давлат рўйхатидан ўтказиш қоидаларини белгилайди. Унда ариза бериш, махсус имтиҳонга қўйиш ва тасдиқловчи ҳужжатларни расмийлаштириш тартиби ҳам назарда тутилган.
Ваколатли орган этиб Тиббиёт ва фармацевтика ходимлари малакасини баҳолаш маркази белгиланган.
2030 йил 1 январдан бошлаб тегишли мутахассислик бўйича давлат рўйхатидан ўтмаган ходимлар шу йўналишда профессионал тиббий ёки фармацевтик фаолият билан шуғуллана олмайди.
Ўтиш даври 2027 йил 1 июлдан 2030 йил 1 январгача давом этади. Бу даврда ходимлар махсус имтиҳон натижалари асосида ихтиёрий равишда ёки малака тоифаси берилганида автоматик тарзда давлат рўйхатидан ўтишлари мумкин бўлади.
Айрим мутахассислар учун имтиҳондан ўтиш бўйича истисно назарда тутилган. Мутахассислиги бўйича камида 20 йиллик иш стажи ва илмий даражасига эга ходимлар махсус имтиҳонсиз давлат рўйхатидан ўтишлари мумкин.
Бироқ бу қоида давлат рўйхатидан ўтиш учун мурожаат қилган пайтда ўз мутахассислиги бўйича уч йил ва ундан ортиқ вақт давомида узлуксиз профессионал фаолият юритмаган шахсларга нисбатан татбиқ этилмайди.
Рўйхатдан ўтиш учун аризаларни Давлат хизматлари марказлари, Ягона интерактив давлат хизматлари портали ёки Тиббий малака платформаси орқали топшириш мумкин бўлади. Электрон ариза бериш хизмати дам олиш ва байрам кунларини ҳам қўшган ҳолда сутка давомида ишлайди.
Ваколатли орган ариза берувчининг анкетасини беш иш куни ичида кўриб чиқади. Текширув натижаларига кўра, мутахассисни махсус имтиҳонга қўйиш ёки қўймаслик тўғрисида қарор қабул қилинади.
Давлат рўйхатидан ўтганлик тўғрисидаги гувоҳнома электрон шаклда расмийлаштирилади. Ҳужжатнинг ҳақиқийлигини тиббиёт ва фармацевтика соҳаси мутахассисларининг ягона электрон реестри орқали текшириш мумкин бўлади. Гувоҳноманинг қоғоздаги асл нусхаси ёки дубликати берилмайди.
Профессионал фаолият билан шуғулланиш ҳуқуқини сақлаб қолиш учун мутахассислар ҳар беш йилда давлат рўйхатидан қайта ўтишлари керак бўлади.
Қарор расмий эълон қилинган кундан эътиборан уч ой ўтгач кучга киради.