Тошкент, Ўзбекистон — Қирғизистон Президенти Садир Жапаров Туркий давлатлар Парламент ассамблеяси (ТуркПА)га аъзо мамлакатлар парламентлари раҳбарлари билан учрашув ўтказди. Музокаралар Ассамблеянинг 15-ялпи мажлиси доирасида Бишкек шаҳрида бўлиб ўтди.
Учрашув иштирокчилари мезбонлик учун Қирғизистон томонига миннатдорлик билдириб, мамлакатнинг туркий дунё бирлигини мустаҳкамлашга қўшаётган ҳиссасини таъкидладилар.
Ўзбекистон Олий Мажлиси Сенати Раиси Танзила Нарбаева Тошкент ва Бишкек ўртасидаги муносабатлар икки мамлакат президентлари — Шавкат Мирзиёев ва Садир Жапаровнинг сиёсий иродаси ҳамда ўзаро ишончга асосланган мулоқоти туфайли изчил ривожланиб бораётганини таъкидлади.
Қирғизистон раҳбари эса ТуркПА мажлисининг Бишкекда ўтказилиши қардош давлатлар ўртасидаги дўстлик, ўзаро ишонч ва ҳамжиҳатлик мустаҳкамланиб бораётганини акс эттиришини қайд этди.
Томонлар, шунингдек, Ассамблеянинг парламентлараро алоқаларни ривожлантириш, интеграция жараёнларини қўллаб-қувватлаш ва туркий халқлар ўртасидаги ҳамкорликни кенгайтиришдаги аҳамиятини таъкидладилар.
ТуркПАнинг аъзо давлатлар ўртасидаги алоқаларни мустаҳкамлаш ҳамда савдо-иқтисодиёт, транспорт, энергетика, рақамлаштириш ва гуманитар соҳалардаги ҳамкорликни ривожлантиришдаги ролига алоҳида эътибор қаратилди.