Тошкент, Ўзбекистон — Тожикистон Республикаси Олий Мажлиси Миллий Мажлиси делегацияси Ўзбекистонга ташрифи доирасида Бухоро шаҳридаги тарихий ва меъморий ёдгорликлар билан танишди.
Меҳмонларга қадимий шаҳар тарихи, унинг меъморий хусусиятлари ва маданий мероси ҳақида маълумот берилди. Бу ҳақда Ўзбекистон Олий Мажлиси Сенати матбуот хизмати хабар берди.
Ташриф давомида делегация аъзолари Бухоронинг тарихий қисмида жойлашган икки машҳур обида — Исмоил Сомоний мақбараси ва Арк қалъасини зиёрат қилди.
Тожикистон вакилларига мазкур иншоотларнинг қурилиш тарихи, меъморий хусусиятлари ҳамда минтақа маданий меросидаги ўрни ҳақида сўзлаб берилди.
Исмоил Сомоний мақбараси Марказий Осиё меъморчилигининг энг ноёб намуналаридан бири ҳисобланади. У IX–X асрлардаги меъморчилик анъаналарини ўзида акс эттиради.
Арк қалъаси кўп асрлар давомида Бухоро ҳукмдорларининг қароргоҳи ва давлат бошқаруви маркази вазифасини бажарган. Бугунги кунда ҳам у шаҳарнинг муҳим тарихий ёдгорликларидан бири бўлиб қолмоқда.
Меҳмонлар қадимий иншоотларнинг меъморий қиёфаси сақлангани, тарихий мерос ва Бухоронинг ўзига хос муҳитини юқори баҳолади.