Тошкент, Ўзбекистон —
UN-NYG (United Nations – Nuclear Young Generation) халқаро ёшлар бирлашмаси Атом ҳамкорлиги бўйича Ёшлар декларациясига қўшилди. Ҳужжатга имзо қўйиш БМТнинг Атом энергияси бўйича халқаро агентлиги (МАГАТЭ) Бош конференциясининг 70-сессияси доирасида UN-NYG ва «Росатом» давлат корпорацияси томонидан ташкил этилган қўшма тадбирда бўлиб ўтди.
Декларация халқаро ҳамкорлик, билим алмашинуви ва ёш мутахассисларни атом саноатини ривожлантириш жараёнига жалб этиш масалаларига бағишланган. Ҳужжат ядро соҳасида очиқ мулоқот, билим алмашинуви ва авлодлар давомийлиги тамойилларини мустаҳкамлайди.
UN-NYGнинг декларацияга қўшилиши ёш мутахассисларни атом саноатининг келажагини шакллантириш жараёнида иштирок этишга умумий интилишни тасдиқлайди. Ҳужжат ядровий хавфсизлик ва ҳимоя, таълим ва билимлардан тенг фойдаланиш, ядро илми ва технологияларидан тинч мақсадларда фойдаланиш, ёшлар етакчилиги, узлуксиз ривожланиш, халқаро ҳамкорлик ҳамда ядровий технологиялар соҳасидаги ютуқлардан масъулиятли фойдаланишга оид еттита тамойилни ўз ичига олади.
«Биз турли мамлакатлардан бўлган ёш етакчилар билан биргаликда глобал кун тартибини шакллантирмоқдамиз. Декларациянинг имзоланиши ёш атомчиларнинг халқаро ҳамкорлиги учун янги имкониятларни очади ва билимларни келажак авлодларга етказиш учун мустаҳкам пойдевор яратади», — деди «Росатом» бош директори ўринбосари, кадрлар бўйича директор Татьяна Терентьева.
Ҳужжат 2025 йил сентябрь ойида Москвада бўлиб ўтган Жаҳон атом ҳафталиги доирасида ишлаб чиқилган. Уни тайёрлашда 33 мамлакатдан 81 та ташкилот вакили бўлган 100 нафар ёш мутахассис иштирок этган.
«Атом ҳамкорлиги бўйича Ёшлар декларациясига қўшилиб, биз шуни тасдиқлаймизки, ядро ҳамжамиятининг ёш етакчилари ўзгаришларни шунчаки кузатиб турмайди — биз уларнинг бир қисмимиз. Барқарор ядровий келажакни таъминлашда бизнинг овозимиз муҳим», — таъкидлади UN-NYG президенти Федерико Верли.
Тадбир давомида иштирокчилар ёш мутахассисларнинг ядро илмини ривожлантиришга қўшаётган ҳиссаси, кадрлар тайёрлаш ва атом саноатида халқаро меъёрларни шакллантириш масалаларини муҳокама қилди.
«Кейинги авлод: ёшлар овози» мавзусидаги панель муҳокамасида МАГАТЭ, Women in Nuclear Global Young Generation, African Young Generation in Nuclear (AYGN), «Росатом» Корпоратив академияси ва UN-NYG вакиллари иштирок этди.