Тошкент, Ўзбекистон — IT Park Uzbekistan ва OITE Global ўртасида ўзаро англашув меморандуми имзоланди. Ҳужжат Ўзбекистон технологик компаниялари ва стартапларининг Уммонда ўтказиладиган COMEX тадбирларида иштирокини кенгайтиришни назарда тутади. Бу ҳақда IT Park Uzbekistan хабар берди.
IT Park Uzbekistan бош директори маслаҳатчиси Абдулаҳад Кўчқоровнинг OITE Global ва COMEX бош директори Амр Абдулла Баабуд билан учрашуви ICT WEEK Uzbekistan 2026 доирасида бўлиб ўтди.
Томонлар ҳамкорлик истиқболларини, жумладан, Ўзбекистон IT-компаниялари ва стартапларининг COMEX Global Technology Show кўргазмасида иштирок этиши, шунингдек, Ўзбекистоннинг технологик салоҳиятини халқаро майдонда намойиш этиш имкониятларини муҳокама қилди.
Учрашувда Маскат шаҳридаги Oman Convention & Exhibition Centre мажмуасида 1–4 февраль кунлари бўлиб ўтадиган COMEX 2027 кўргазмасига тайёргарлик масаласига алоҳида эътибор қаратилди.
Учрашув иштирокчилари IT Park Uzbekistan’нинг турли форматларда иштирок этиши, шунингдек, маҳаллий технологик лойиҳаларни илгари суриш мақсадида қўшимча тадбирлар ўтказиш имкониятларини кўриб чиқди.
Муҳокаманинг алоҳида йўналиши стартапларни инвесторлар билан боғлаш масаласи бўлди. Томонлар COMEX экотизимида Марказий Осиё стартаплари учун махсус йўналиш ташкил этиш, потенциал инвесторлар, технологик компаниялар ва халқаро ҳамкорлар билан учрашувлар ўтказиш имкониятини кўриб чиқди.
Имзоланган меморандум Ўзбекистон стартапларининг COMEX тадбирларида расмий иштирокини қўллаб-қувватлаш, технологик экотизимлар ўртасидаги алоқаларни ривожлантириш ҳамда Ўзбекистонда COMEX тадбирларини ўтказиш имкониятларини ишлаб чиқишни назарда тутади.
COMEX давлат тузилмалари, технологик компаниялар, стартаплар, инвесторлар ва соҳа экспертларини бирлаштиради. Кўргазма мавзулари электрон ҳукумат, сунъий интеллект, булутли технологиялар, киберхавфсизлик, молиявий технологиялар, Gaming & Esports, робототехника, ақлли шаҳарлар, космик ва учувчисиз технологиялар, барқарор энергетика, AgriTech ва HealthTech йўналишларини қамраб олади.
Ташкилотчилар маълумотларига кўра, 2025 йилда COMEX кўргазмасига 90 мингдан ортиқ киши ташриф буюрган. Тадбирларда 200 дан зиёд давлат ва хусусий ташкилот ҳамда 140 дан ортиқ технологик стартап иштирок этган. Кўргазма доирасида умумий қиймати қарийб 116 млн уммон риали бўлган 150 дан ортиқ келишув имзоланиши эълон қилинган.
COMEX 2027 кўргазманинг 35-чи юбилей тадбири бўлади. Унинг ташкилотчиси OITE Global бўлиб, компания 40 йилдан ортиқ вақт давомида Уммонда халқаро кўргазмалар, конференциялар ва бизнес тадбирларини ташкил этиб келмоқда.
IT Park Uzbekistan’нинг COMEX билан ҳамкорлиги амалий асосга эга.
2025 йил сентябрь ойида IT Park Uzbekistan делегацияси ҳамда Detecting AI, BRB Tech ва Fleetroot резидентлари Маскат шаҳрида бўлиб ўтган COMEX Technology Show кўргазмасида иштирок этди. Кўргазма давомида улар Уммон ва халқаро компаниялар билан музокаралар ўтказиб, экспорт ва технологик лойиҳаларни муҳокама қилди.
Янги меморандум Ўзбекистон технологик компаниялари ва стартапларининг COMEX майдонидаги иштирокини янада кенгайтириш ҳамда Уммон ва Форс кўрфази мамлакатлари билан ишбилармонлик алоқаларини ривожлантириш учун асос яратади.