Тошкент, Ўзбекистон — Ўзбекистон ва Тожикистон юк ташишни тезлаштириш ҳамда икки мамлакат ўртасидаги савдо-сотиққа тўсқинлик қилаётган муаммоларни бартараф этиш чораларини кўришга келишиб олди. Бу ҳақда Ўзбекистон Транспорт вазирлиги хабар берди.
Ўзбекистон транспорт вазири Илҳом Маҳкамов Тожикистон иқтисодий ривожланиш ва савдо вазири ўринбосари Рухшона Насриддинзода бошчилигидаги делегация билан музокаралар ўтказди.
Томонлар транспорт-логистика соҳасидаги ҳамкорликни кенгайтириш, ўзаро юк ташиш ҳажмини ошириш, экспорт ва транзит тартиб-таомилларини соддалаштириш масалаларини кўриб чиқди.
Ўзбекистондан Тожикистонга автомобиль транспорти орқали қурилиш материалларини етказиб бериш учун ундириладиган йиғимларга алоҳида эътибор қаратилди. Шунингдек, Тожикистон ҳудудига темир йўл орқали келтириладиган экспорт юкларини тушириш жараёнини тезлаштириш ва бу билан боғлиқ муаммоларни ҳал этиш масалалари муҳокама қилинди.
Бундан ташқари, томонлар давлат чегарасини кесиб ўтиш пунктларининг ўтказувчанлик қобилиятини ошириш ва ташувчилар учун янада қулай шароитлар яратиш бўйича фикр алмашди.
Учрашув якунида Ўзбекистоннинг Тожикистонга экспортини кўпайтириш, юк ташишни тезлаштириш ва мавжуд тўсиқларни бартараф этиш учун зарур чораларни қисқа муддатларда кўриш бўйича келишувга эришилди.