Тошкент, Ўзбекистон — Тошкент вилояти ва Хитойнинг Чжэцзян провинцияси савдо ҳажмини кенгайтириш ҳамда янги инвестиция лойиҳаларини амалга ошириш имкониятларини муҳокама қилди. Бу ҳақда Тошкент вилояти ҳокимлиги хабар берди.
Вилоят ҳокими ўринбосари Жамшид Бобажонов Хитойнинг Чжэцзян провинцияси Савдо департаменти бош директори ўринбосари Хань Цзюнь бошчилигидаги делегация билан учрашув ўтказди.
Томонлар икки ҳудуднинг иқтисодий ва инвестициявий салоҳияти, шунингдек, ўзаро товар айирбошлаш ҳажмини ошириш имкониятларини кўриб чиқди. Инвестицияларни жалб қилиш ва янги қўшма лойиҳаларни йўлга қўйиш масалаларига алоҳида эътибор қаратилди.
Учрашув иштирокчилари ишлаб чиқариш қувватларини ривожлантириш ва саноатга замонавий технологияларни жорий этиш бўйича фикр алмашди. Логистика ва туризм ҳам истиқболли ҳамкорлик йўналишлари сифатида қайд этилди.
Томонлар ишбилармон доиралар вакиллари ўртасида тўғридан-тўғри алоқаларни мустаҳкамлаш зарурлигини таъкидлади. Шунингдек, истиқболли инвестиция таклифларини амалий лойиҳаларга айлантириш ва янги йўналишларда иқтисодий ҳамкорликни кенгайтириш вазифалари белгилаб олинди.
Чжэцзян Хитойнинг шарқий қисмида жойлашган бўлиб, унинг маъмурий маркази Ханчжоу шаҳри ҳисобланади. Манба маълумотларига кўра, провинция аҳолиси 67 млн нафардан ортиқ.
Ҳудуднинг ривожланган тармоқлари қаторига машинасозлик, электроника, тўқимачилик ва кимё саноати, юқори технологиялар, ташқи савдо ҳамда логистика киради. Провинциянинг туристик салоҳияти ҳам алоҳида қайд этилган.