Тошкент, Ўзбекистон — Айни кунларда Қишлоқ хўжалиги вазирлиги делегацияси Вьетнам Социалистик Республикасида бўлиб турибди. Делегация аъзолари 10-ILDEX Vietnam халқаро қишлоқ хўжалиги кўргазмасида иштирок этиб, соҳадаги замонавий технологиялар ҳамда янги ишланмалар билан танишди.
Ташриф давомида Кулонг дельта шоличилик илмий-тадқиқот институтига ташриф буюрилди. Музокараларда 2030 йилгача шоличилик йўналишида илмий-инновацион ҳамкорликни ривожлантириш бўйича қўшма дастурни амалга оширишга келишилди.
Шунингдек, Вьетнам селекциясига мансуб эртапишар ва стресс омилларига чидамли 20 хил нав ҳамда намуналар Ўзбекистон томонига топширилди. Ушбу навлар шўрланиш, касаллик ва қурғоқчиликка бардошлилиги билан аҳамиятли ҳисобланади.
Вьетнам шоли етиштириш бўйича дунёдаги етакчи давлатлардан бири бўлиб, гуруч экспортида жаҳонда иккинчи ўринни эгаллайди. Мамлакатда йилига уч мартагача ҳосил олиниб, 43 миллион тоннадан ортиқ шоли етиштирилади.
Ташриф доирасида шоли похолида қўзиқорин етиштириш технологиясини Ўзбекистонга трансфер қилиш, гуручни қайта ишлаш орқали крахмал, спирт ва чорва озуқаси ишлаб чиқариш, шоли майдонларидан чиқадиган метан газларини илмий таҳлил қилиш, шунингдек, илмий ходимлар малакасини ошириш ва қўшма тадқиқотларни амалга ошириш бўйича ташаббуслар илгари сурилди.
Вьетнамнинг Қишлоқ хўжалиги ва атроф-муҳит вазирлиги вакиллари билан учрашувда паррандачилик, асаларичилик, чорвачилик ва балиқчилик йўналишларида инвестиция лойиҳаларини амалга ошириш масалалари муҳокама қилинди.
Хусусан, йилига 80 миллион бош парранда ва 4 миллион тонна озуқа ишлаб чиқариш қувватига эга Нидерландиянинг Вьетнамдаги “De Heus” компанияси раҳбари билан учрашув ўтказилди.
Музокараларда Ўзбекистонда етиштирилган меваларни Вьетнамга экспорт қилиш, Ветнамнинг тропик меваларини импорт қилиш, шунингдек, ипакчилик, канопчилик ва жут етиштириш бўйича ҳамкорликни кенгайтириш масалалари ҳам қайд этилди.
Кўргазма доирасида Италиянинг «Filiera» компанияси билан озуқа экинлари уруғчилиги, Бельгиянинг «Jodobet» компанияси билан лавлагидан чорва учун оқсил олиш ва микроэлементли ўғитлар ишлаб чиқариш, Кореянинг “Saturn Bio Tek” компанияси билан эса уруғларни биоўғитлар билан капсулалаш лойиҳалари юзасидан ҳамкорликка келишилди.
Якунда ветнамлик талабаларни Ўзбекистондаги қишлоқ хўжалиги олий таълим муассасаларига ўқишга таклиф қилиш ҳамда қишлоқ хўжалиги маҳсулотларини қайта ишлаш ва қадоқлаш корхоналари тажрибасини ўрганиш режалаштирилган.