Тошкент, Ўзбекистон — Россия мустақил касаба уюшмалари федерацияси делегацияси Ўзбекистоннинг туристик салоҳиятига бағишланган танишув тури доирасида Тошкент, Самарқанд ва Тошкент вилоятида бўлди. Россия томони вакиллари туристик инфратузилма ҳамда касаба уюшмалари аъзолари ва уларнинг оилалари учун саёҳатларни ташкил этиш имкониятларини ўрганди. Бу ҳақда Ўзбекистон Республикаси Туризм қўмитаси хабар берди.
Тошкентда делегация пойтахтнинг туристик ва маданий объектларига, жумладан, Ислом цивилизацияси марказига ташриф буюрди, шунингдек, сайёҳлар учун яратилган замонавий инфратузилма билан танишди.
Самарқандда Россия вакиллари шаҳарнинг асосий диққатга сазовор жойларини кўздан кечириб, унинг тарихий-маданий меросини ўргандилар. Маданий-маърифий ва зиёрат туризмини ривожлантириш имкониятларига алоҳида эътибор қаратилди.
Тошкент вилоятида делегация туристик ва рекреацион объектлар, жумладан, санаторийлар ҳамда болалар соғломлаштириш оромгоҳлари билан танишди. Ташриф иштирокчилари уларнинг оилавий, болалар ва санаторий-соғломлаштириш дам олиш турларини ташкил этишдаги салоҳиятини баҳоладилар.
Дастурнинг бир қисми Тошкент — Самарқанд йўналиши бўйлаб «Афросиёб» тезюрар поездида саёҳатдан иборат бўлди. Россия вакиллари Ўзбекистоннинг икки туристик маркази ўртасидаги темир йўл қатнови имкониятлари билан амалда танишдилар.
Танишув тури якунига кўра, делегация мамлакатдаги Россия касаба уюшмалари аъзолари ва уларнинг оилалари учун ташкил этиладиган дам олиш дастурларига киритилиши мумкин бўлган туристик объектлар ва инфратузилма ҳақида тасаввурга эга бўлди.
Ташриф Ўзбекистон Туризм қўмитаси ва Россия Мустақил касаба уюшмалари федерацияси ўртасида эришилган келишувларнинг давоми бўлиб, ўзаро туристик алмашинувни янада ривожлантиришга қаратилган.