Тошкент, Ўзбекистон — AKFA Aluminium Group келаси ҳафта Лондонда халқаро инвесторлар билан облигацияларни илк бор жойлаштириш имкониятига тайёргарлик доирасида учрашувлар ўтказади. Роуд-шоуни ташкил этиш учун компания Citigroup ва JPMorgan банкларини жалб қилди.
Bloomberg маълумотига кўра, бўлажак учрашувлар танишув хусусиятига эга бўлиб, облигацияларни яқин вақт ичида жойлаштириш режалаштирилмаган. Музокараларда компаниянинг юқори раҳбарияти иштирок этади.
AKFA Aluminium Group Ўзбекистоннинг энг йирик хусусий ишлаб чиқарувчиларидан бири ҳисобланади. Компания қурилиш соҳаси учун алюминий ва пластик маҳсулотлар ишлаб чиқаради ҳамда ўз маҳсулотларини 30 дан ортиқ мамлакатга экспорт қилади.
2024 йилдан буён компания S&P Global Ratings агентлигининг B+ даражасидаги узоқ муддатли кредит рейтингига эга. 2025 йил июль ойида агентлик компаниянинг қарз юки ошганини сабаб қилиб, рейтинг прогнозини «барқарор»дан «салбий»га ўзгартирган.
