Тошкент, Ўзбекистон — Япония Иммиграция хизматлари агентлиги бир неча кун олдин мамлакатда ноқонуний бўлиб турган Ўзбекистон фуқаросини юртига депортация қилди. Бу ҳақда Япониянинг Ўзбекистон Республикасидаги элчихонаси маълум қилди.
Элчихона маълумотларига кўра, эркак Японияга «Техник стажёр» визаси билан келган. Визанинг амал қилиш муддати тугаганидан кейин у мамлакатда ноқонуний қолган, кейинчалик эса маҳаллий ҳокимият органлари томонидан қўлга олинган.
Элчихона Японияда ноқонуний бўлиб туриш ёки рухсатсиз ишлаш учун қатъий чоралар белгиланганини эслатди.
Қоидабузарлар полиция томонидан ушланиши ва ҳибсга олиниши, иммиграция марказига жойлаштирилиши ҳамда депортация қилиниши мумкин.
Бундан ташқари, Япония ҳукумати қоидабузарлар ҳақидаги маълумотларни Ўзбекистон ҳукуматига тақдим этади. Шу сабабли улар ватанга қайтганидан кейин ҳам тегишли чоралар кўрилиши мумкин.
Элчихона фуқароларни ўта эҳтиёткор бўлишга ва «Японияда ишлаш мумкин» каби енгил-елпи ваъдаларга ишонмасликка чақирди.
Дипломатик ваколатхона, шунингдек, кенг тарқалган нотўғри тушунчалардан бирига алоҳида эътибор қаратди. Айримлар қочқин мақомини олиш учун ариза бериш Японияда узоқ вақт қолиш ёки ишлаш имконини беради, деб ҳисоблайди. Элчихона бундай мақсадда ариза топшириш мумкин эмаслигини таъкидлади.
Агар қочқин мақомини бериш рад этилса, шахс иммиграция марказига жойлаштирилиши ёки депортация қилиниши мумкин. Ариза топширишда ёлғон маълумотлар бериш ёки фирибгарлик усулларидан фойдаланиш жиддий ҳуқуқий чораларга сабаб бўлиши мумкин.