Тошкент, Ўзбекистон — Ҳиндистон ҳукумати тиббиёт йўналишлари бўйича таҳсил олаётган ҳиндистонлик талабаларни ўқитиш масалаларида Ўзбекистон билан ҳамкорликни давом эттирмоқда.
Нью-Дели улар олаётган таълим Ҳиндистон Миллий тиббиёт комиссияси (NMC) талабларига мувофиқ бўлишини таъминлаш ниятида. Бу ҳақда Ҳиндистон Ташқи ишлар вазирлиги расмий вакили Рандхир Жайсвал маълум қилди.
Сешанба куни Нью-Делида оммавий ахборот воситалари учун ўтказилган мунтазам брифингда у Ҳиндистон фуқароларининг Ўзбекистондаги MBBS тиббиёт дастурларига ўқишга кириш сони камайиши ҳақидаги саволга изоҳ берди.
Жайсвалнинг сўзларига кўра, Ҳиндистон томони Ўзбекистон расмийлари билан алоқаларни сақлаб келмоқда. Шунингдек, у бўлажак талабаларга Ҳиндистоннинг Тошкентдаги элчихонаси ва Миллий тиббиёт комиссияси томонидан эълон қилинган тушунтиришлар билан танишиб чиқишни тавсия қилди. Ушбу тавсиялар нафақат Ўзбекистонда, балки бошқа мамлакатларда ҳам тиббиёт йўналишлари бўйича таҳсил олишни режалаштираётган абитуриентларга тааллуқли.
Ташқи ишлар вазирлиги вакили Ҳиндистон ҳукумати талабаларни тайёрлаш сифатига, шунингдек, уларни Ҳиндистонда ҳам, хорижда ҳам инсофсиз воситачилар ва бошқа шахслар томонидан эҳтимолий эксплуатация қилиниши ва алдовлардан ҳимоя қилишга алоҳида эътибор қаратишини таъкидлади.
Жорий йил апрель ойида NMC Ўзбекистонда базавий тиббий таълим олишни режалаштираётган ҳиндистонлик абитуриентлар учун тавсиялар эълон қилган эди. Комиссия ҳужжатда Ҳиндистон фуқароларининг хориждаги хусусий тиббиёт коллежларига ўқишга кириш ҳолатлари учраётганини қайд этди. Улардаги таълим дастурлари ва ўқиш шароитлари Ҳиндистонда белгиланган талабларга мувофиқ эмас.
Комиссия бўлажак талабаларни таълим муассасаларининг мақомини текширишга, рухсат этилмаган муассасалар ёки меъёрий стандартларга жавоб бермайдиган дастурларга ўқишга кирмасликка чақирди.
NMC огоҳлантиришича, белгиланган талабларга риоя қилмаслик Ҳиндистонда тиббий малака бўйича рўйхатдан ўтиш рад этилишига олиб келиши мумкин.
Мажбурий мезонлар қаторига таълим давомийлиги, ўқитиш тили, ўқув дастурининг мазмуни, клиник тайёргарлик ҳажми, шунингдек, интернатура ёки клиник амалиётни ўташ шартлари киради.