Тошкент, Ўзбекистон — Ўзбекистон рақамли технологиялар вазири Шерзод Шерматов Швейцариянинг Ўзбекистондаги Фавқулодда ва Мухтор Элчиси Симон Гигер билан учрашув ўтказди. Бу ҳақда Рақамли технологиялар вазирлиги хабар берди.
Томонлар рақамли технологиялар, сунъий интеллект, инновациялар, инвестициялар ва илмий-тадқиқот фаолияти соҳаларида ҳамкорликни янада ривожлантириш йўналишларини кўриб чиқди.
Шерзод Шерматов мамлакатда рақамли трансформация соҳасида амалга оширилаётган ислоҳотлар, IT саноати ва стартап экотизимини ривожлантириш бўйича маълумот берди. Хорижий инвестицияларни жалб қилиш учун шароит яратиш, IT хизматлари экспортини кенгайтириш ва дастурий ечимларни бошқа технологик имкониятлар билан уйғунлаштирган стартапларни қўллаб-қувватлаш борасидаги ишлар алоҳида қайд этилди.
Музокараларда сунъий интеллект масаласига ҳам алоҳида эътибор қаратилди. Икки мамлакат вакиллари рақамли таълим ва бошқа соҳаларда қўлланилиши мумкин бўлган очиқ ва амалий сунъий интеллект моделларини ишлаб чиқиш юзасидан фикр алмашди.
Бундан ташқари, томонлар Швейцария компанияларининг Ўзбекистондаги инвестиция лойиҳаларида янада фаол иштирок этиши имкониятларини муҳокама қилди. Хусусан, Швейцариянинг экспортни қўллаб-қувватлаш механизмларидан фойдаланиш ва икки мамлакат ўртасидаги ишбилармонлик алоқаларини янада мустаҳкамлаш масалалари кўриб чиқилди.
Учрашув якунида томонлар тегишли ташкилотлар ва хусусий сектор вакиллари ўртасидаги ҳамкорликни давом эттиришга тайёрлигини тасдиқлади. Шунингдек, Ўзбекистон ва Швейцариянинг рақамли технологиялар соҳасидаги ҳамкорлигини янада ривожлантиришдан манфаатдорлик билдирилди.