Тошкент, Ўзбекистон — Норвегия миллий терма жамоаси футбол бўйича жаҳон чемпионати тарихида илк бор чорак финалга йўл олди. Жамоа мусобақанинг 1/8 финалида Бразилияни 2:1 ҳисобида мағлуб этди. Учрашув АҚШнинг Нью-Жерси штатидаги Ист-Ратерфорд шаҳрида бўлиб ўтди.
Учинчирашувнинг бош қаҳрамони Эрлинг Холанд бўлди. Норвегия терма жамоаси ҳужумчиси дубль қайд этиб, 79 ва 90-дақиқаларда гол урди. Бразилиянинг ягона голини Неймар 90+10-дақиқада пенальтидан киритди.
Бразилия биринчи бўлимда ҳам пенальти ишлаб олган эди. Бироқ 14-дақиқада Бруно Гимарайнс рақиб дарвозабонини доғда қолдира олмади.
Чорак финалда Норвегия Мексика ва Англия терма жамоалари ўртасидаги учрашув ғолиби билан баҳс олиб боради.
Бу натижа Норвегия учун тарихий ютуқ бўлди. Жамоа илк бор жаҳон чемпионатининг 1/8 финал босқичидан ўта олди. Бунгача норвегияликлар жаҳон чемпионатида уч марта иштирок этган бўлиб, 1938 ва 1998 йилларда 1/8 финалда мусобақани тарк этган, 1994 йилда эса гуруҳ босқичидан чиқа олмаган.
2026 йилги футбол бўйича жаҳон чемпионати АҚШ, Канада ва Мексикада ўтказилмоқда ҳамда илк бор 48 та терма жамоа иштирокида ташкил этилмоқда. Турнир 19 июль куни якунланади. Амалдаги жаҳон чемпиони Аргентина терма жамоаси ҳисобланади.