Тошкент, Ўзбекистон — Фарғона вилоятида «S.Q.M» МЧЖнинг ноқонуний такрорий текширув натижаларига кўра ҳисобланган 3,2 млрд сўм миқдоридаги солиқ қарзи бекор қилинди. Текширув ўтказган мансабдор шахсга нисбатан маъмурий жазо чораси қўлланилди. Бу ҳақда Бизнес-омбудсман хабар берди.
Вазият корхона раҳбарининг 1100 рақами орқали қилган мурожаатидан сўнг ўрганиб чиқилди. Ҳолатларни ўрганиш давомида «S.Q.M» МЧЖ фаолияти 2023 йил декабрь ойидаёқ Тоғ-кон саноати ва геология соҳасида назорат инспекциясининг Шарқий ҳудудий бошқармаси томонидан текширилгани аниқланди.
Аввалги текширув ўтказилганига қарамай, инспектор корхона фаолиятини 2020–2025 йиллар даври учун қайтадан ўрганган. Бунда, Бизнес-омбудсман таъкидлаганидек, мансабдор шахс назорат тадбирларини ўтказишнинг буйруқ билан белгиланган муддатларини бузган.
Такрорий текширув натижасида корхонага 3,2 млрд сўм миқдорида солиқ қарзи ҳисобланган.
Қоидабузарликка йўл қўйган мансабдор шахсга нисбатан 40 БҲМ миқдорида маъмурий жарима тайинланган.
Тошкент туманлараро маъмурий суди иш материалларини кўриб чиқиб, инспекция мансабдор шахсларининг ҳаракатларини ноқонуний деб топди ва текширув далолатномасини бекор қилди.
Натижада мазкур текширув якунлари бўйича «S.Q.M» МЧЖга ҳисобланган 3,2 млрд сўм миқдоридаги солиқ қарзи бекор қилинди.