Тошкент, Ўзбекистон — Xalq Sug‘urta суғурта компанияси хусусийлаштиришга тайёргарлик доирасида Давлат активларини бошқариш агентлиги (ДAБА) бошқарувига ўтказилди.
Акцияларни ўтказишни «Халқ банки» кузатув кенгаши 21 сентябрь куни маъқуллаган. Бу ҳақда Ягона корпоратив ахборот портали маълумотларида келтирилган.
ДAБАга ҳар бирининг номинал қиймати 1 000 сўм бўлган 80 миллион дона акция топширилди. Ушбу пакетнинг умумий номинал қиймати 80 миллиард сўмни ташкил этади.
Xalq Sug‘urta компаниясини сотиш Ўзбекистон Президентининг 28 августдаги фармонида назарда тутилган. Ҳужжатга мувофиқ, 2026–2027 йилларда 62 та корхонадаги давлатга тегишли акциялар пакетлари ва улушлари очиқ савдоларга чиқарилиши белгиланган.
2026 йил 1 июль ҳолатига кўра, суғурта компаниясининг активлари 278,54 миллиард сўмга, устав капитали эса 80 миллиард сўмга етган. Йилнинг дастлабки олти ойида компания 30,12 миллиард сўм даромад олган, шундан 15,42 миллиард сўми соф фойда ҳиссасига тўғри келган.
Xalq Sug‘urta 2011 йил май ойида рўйхатдан ўтказилган. Компания ҳаётни суғурталаш билан боғлиқ бўлмаган суғурта сегментида фаолият юритади. Унинг раҳбари — Собир Қурдашеевич Мамасолиев.
Суғурта компанияси ДAБА бошқарувига ўтказилганидан сўнг, «Халқ банки»нинг устав капиталидаги улуши камида 10 фоизни ташкил этувчи бешта шўъба корхонаси қолди.
Ушбу рўйхатга Xalq Lizing, Xalq Faktoring, Xalq mikromoliya tashkiloti, United Venchures ва Perfect capital investment компаниялари киради.