Тошкент, Ўзбекистон — Акбар Қурбонов «Ўзкимёсаноат» АЖ бошқаруви раисининг инвестиция фаолияти бўйича ўринбосари лавозимидан бошқа ишга ўтиши муносабати билан озод этилди.
Қурбонов компанияда фаолият юритган даврида инвестиция йўналишини ривожлантириш, истиқболли лойиҳаларни амалга ошириш ҳамда кимё саноатининг ишлаб чиқариш салоҳиятини кенгайтиришга қаратилган инвестицияларни жалб этиш билан шуғулланган.
«Ўзкимёсаноат»да қайд этилишича, у замонавий ишлаб чиқариш қувватларини яратиш, янги лойиҳаларни ишлаб чиқиш ва хорижий ҳамкорлар билан инвестициявий ҳамкорликни ривожлантиришга ҳисса қўшган.
Компания жамоаси Акбар Қурбоновга профессионал фаолияти, ишга масъулиятли муносабати ва жамият ривожига қўшган ҳиссаси учун миннатдорлик билдирди ҳамда касбий фаолиятининг янги босқичида унга муваффақият ва янги ютуқлар тилади.
