Тошкент, Ўзбекистон — ICT WEEK Uzbekistan 2026 доирасида IT Park Uzbekistan халқаро алоқалар бўлими раҳбари Дилдора Насибуллаева Hong Kong Science and Technology Park (HKSTP)нинг Яқин Шарқдаги минтақавий ҳамкорлик ва каналларни ривожлантириш бўйича катта менежери Анкит Сетхи билан учрашди.
Томонлар стартаплар, сунъий интеллект ҳамда тадқиқот ва ишланмалар соҳаларидаги ҳамкорликни янада ривожлантириш масалаларини муҳокама қилди. Бу ҳақда IT Park Uzbekistan хабар берди.
Учрашув давомида иштирокчилар технологик компанияларнинг янги бозорларга чиқишини қўллаб-қувватлаш, стартап экотизимлари ўртасидаги ҳамкорликни ривожлантириш, шунингдек, сунъий интеллект ва R&D йўналишларида қўшма ишлаш истиқболларини кўриб чиқди.
HKSTPнинг тўртта стартапи ICT WEEK Uzbekistan 2026 тадбирида иштирок этаётганига алоҳида эътибор қаратилди. Ташриф доирасида компаниялар вакиллари Uzinfocom, Uztelecom ва TUIT билан учрашувлар ўтказди. Томонлар ушбу компанияларни кейинчалик ҳам қўллаб-қувватлаш ва уларнинг Ўзбекистон бозорига чиқишига кўмаклашиш имкониятларини муҳокама қилди.
Шунингдек, ўзбекистонлик стартапларнинг Гонконгга ташрифларини ташкил этиш имконияти кўриб чиқилди. Бундай сафарлар компанияларга HKSTPнинг технологик инфратузилмаси билан танишиш, маҳаллий компаниялар билан алоқалар ўрнатиш ва Гонконг стартап экотизими иштирокчилари билан тажриба алмашиш имконини бериши кутилмоқда.
IT Park Uzbekistan ва HKSTP ўртасидаги ҳамкорлик изчил асосда ривожланмоқда. 2026 йил июль ойида томонлар ўзаро англашув меморандумини имзолаган.
Август ойида HKSTP компаниялари ва стартаплари учун Ўзбекистон бозорига чиқиш имкониятларига бағишланган алоҳида вебинар ташкил этилди. Сентябрь ойида эса IT Park Uzbekistan делегациясининг Гонконгга 2026 йилги Belt and Road Summit тадбирида иштирок этиш учун ташрифи доирасида ҳамкорлик давом эттирилди.
HKSTP Гонконгнинг тадқиқот ва ишланмалар ҳамда deep-tech йўналишларини ривожлантиришга ихтисослашган асосий инновацион платформаларидан бири ҳисобланади.
Парк экотизими 26 та мамлакатдан 2 400 дан ортиқ технологик компания ва тадқиқот ҳамда ишланмалар соҳасидаги 17 000 дан зиёд мутахассисни бирлаштиради.
HKSTPнинг устувор йўналишларига сунъий интеллект, робототехника, биотехнология, финтех, ақлли шаҳарлар учун ечимлар ва илғор ишлаб чиқариш киради.