Тошкент, Ўзбекистон — Покистоннинг металлургия компанияси Pak Steel Ўзбекистонда арматура ва бошқа пўлат маҳсулотларини ишлаб чиқариш бўйича инвестиция лойиҳасини амалга ошириш имкониятини кўриб чиқмоқда. Бу ҳақда Dunyo ахборот агентлиги хабар берди.
Қўшма лойиҳани амалга ошириш истиқболлари Ўзбекистоннинг Исломободдаги элчиси Алишер Тўхтаев ва Pak Steel директори Ҳассан Фарид ўртасида муҳокама қилинди.
Ҳассан Фариднинг сўзларига кўра, Покистонда электр энергияси нархининг юқорилиги ишлаб чиқариш таннархи ва маҳсулотларнинг рақобатбардошлигига салбий таъсир кўрсатмоқда.
Шу муносабат билан компания энергетика ресурслари нисбатан қулайроқ бўлган Ўзбекистонни янги ишлаб чиқариш корхонасини ташкил этиш учун майдон сифатида кўриб чиқмоқда.
Pak Steel томонидан инобатга олинаётган бошқа омиллар қаторида саноат зоналарида инфратузилманинг мавжудлиги, шунингдек, инвесторларга тақдим этиладиган имтиёз ва преференциялар қайд этилди.
Компания, шунингдек, уй-жойлар, меҳмонхоналар, дамбалар ва транспорт инфратузилмаси объектларини қуриш лойиҳаларида иштирок этишга тайёрлигини билдирди.
Учрашув якунлари бўйича томонлар Ўзбекистоннинг тегишли давлат органлари билан видеоконференциялар ташкил этиш ва кейинги ҳамкорлик бўйича «йўл харитаси»ни ишлаб чиқишга келишиб олди. Кейинчалик Pak Steel раҳбариятининг Ўзбекистонга ташрифи кутилмоқда.
Pak Steel, шунингдек, Pakistan Steel Mills номи билан ҳам танилган бўлиб, 1949 йилда ташкил этилган. Компания арматура, оддий ва деформацияланган пўлат стерженлар, швеллерлар ва бошқа металл конструкциялар жумладан, турли хил пўлат маҳсулотларини ишлаб чиқаради.
Унинг маҳсулотларидан Покистонда йўл иншоотлари, метро, турар жой ва маъмурий бинолар, саноат объектлари ҳамда бошқа иншоотларни қуришда фойдаланилади.