Тошкент, Ўзбекистон — Фирибгарликда айбланиб, халқаро қидирувда бўлган Ўзбекистон фуқароси халқаро полиция ҳамкорлиги натижасида республикага қайтарилди. Бу ҳақда Ўзбекистон Республикаси Интерпол Миллий марказий бюроси хабар қилди.
Идора маълумотига кўра, операция Интерпол Миллий марказий бюроси мувофиқлаштирувида ҳамда Ўзбекистон Ички ишлар вазирлигининг республиканинг Дубай шаҳридаги Бош консулхонаси ҳузуридаги вакили бевосита иштирокида амалга оширилди.
Интерпол маълум қилишича, айб сифатида қўйилган жиноятларни содир этганидан кейин қидирувдаги шахс Ўзбекистон ҳудудини тарк этган ва жиноий жавобгарликдан қочиш мақсадида узоқ вақт давомида хорижда яширинган.
Тезкор маълумотлар алмашинуви, хорижий ҳамкорлар билан ҳамкорлик ҳамда ўтказилган тезкор-қидирув тадбирлари натижасида ҳуқуқни муҳофаза қилувчи органлар гумонланувчининг қаердалиги аниқлашга муваффақ бўлди.
Зарур процессуал тартиб-таомиллар бажарилганидан сўнг у миллий қонунчиликка мувофиқ жиноий жавобгарликка тортиш учун Ўзбекистонга қайтарилди.
Ўзбекистон Республикаси Интерпол Миллий марказий бюросида таъкидланишича, мазкур ҳолат Интерпол йўналиши бўйича халқаро ҳамкорлик, шунингдек, тергов ва суддан яширинаётган шахсларни қидириш ҳамда уларни қайтаришда Ўзбекистон Ички ишлар вазирлигининг хориждаги вакиллари билан ўзаро ҳамкорлик самарадорлигини тасдиқлайди.
Идора халқаро қидирувга берилган шахсларнинг турган жойини аниқлаш ва уларни Ўзбекистонга қайтариш бўйича ишларни изчил давом эттиришини маълум қилди.
Бюро маълумотига кўра, мамлакат ташқарисида яширинишга бўлган уринишлар халқаро полиция ҳамкорлигининг амалдаги механизмлари туфайли одил судловдан қочиш имконини бермайди.