Тошкент, Ўзбекистон — 2026 йил 14 августдан Ўзбекистон ва Покистон имтиёзли савдо режими татбиқ этиладиган товарлар рўйхатини кенгайтиради. Тегишли протокол Ўзбекистон Президентининг 2026 йил 10 июлдаги қарори билан тасдиқланган.
Ҳужжатга мувофиқ, имтиёзли савдо режими қарийб 90 та товар позициясига татбиқ этилади. Икки давлат маҳсулотлари учун божхона божларини пасайтириш ва савдо тартиб-таомилларини соддалаштириш назарда тутилган.
Ўзбекистонлик экспортчилар учун имтиёзлар мева-сабзавот ва озиқ-овқат маҳсулотларининг айрим турлари, ичимлик суви, тўқимачилик маҳсулотлари, ип-калава, трикотаж матолар, мисдан тайёрланган буюмлар, электротехника маҳсулотлари, дори воситалари ҳамда санитария-техника буюмларига нисбатан амал қилади.
Қайд этилишича, келишувнинг кенгайтирилиши Ўзбекистон корхоналарининг Покистон бозорига чиқиши, ўзаро савдо ҳажмини ошириш, инвестициявий ҳамкорлик ва саноат кооперациясини ривожлантириш учун қўшимча имкониятлар яратади.
Инвестициялар, саноат ва савдо вазирлигига масъул идоралар билан биргаликда маҳаллий экспортчиларга янги савдо имтиёзларидан самарали фойдаланишлари учун кўмак бериш вазифаси юклатилди.
