Тошкент, Ўзбекистон — 8 июль куни Ўзбекистон Республикаси Инвестициялар, саноат ва савдо вазири Лазиз Кудратов BYD компаниясининг Марказий Осиё ва Кавказ минтақалари бўйича бошқарувчи директори Сао Шуанг билан учрашув ўтказди.
BYD электромобиллар ҳамда янги энергия манбаларида ҳаракатланувчи транспорт воситаларини ишлаб чиқарувчи дунёнинг етакчи компанияларидан бири ҳисобланади. 2024 йил июнь ойида Жиззах вилоятида BYD автомобилларини ишлаб чиқариш йўлга қўйилди.
Учрашув давомида томонлар Ўзбекистонда электромобиллар ишлаб чиқариш лойиҳасини амалга оширишнинг жорий натижаларини кўриб чиқиб, ишлаб чиқариш қувватларини кенгайтириш, маҳаллийлаштириш даражасини ошириш ҳамда корхонанинг экспорт салоҳиятини юксалтириш бўйича истиқболдаги режаларни муҳокама қилдилар.
Шунингдек, ишлаб чиқариш инфратузилмасини кенгайтириш, экспорт ҳажмларини ошириш ҳамда республика ҳудудида тезкор қувватлаш станциялари тармоғини барпо этиш масалаларига алоҳида эътибор қаратилди.
Музокаралар якунида томонлар узоқ муддатли ҳамкорликни янада мустаҳкамлаш ҳамда Ўзбекистонда BYD лойиҳасининг муваффақиятли амалга оширилиши ва барқарор ривожланишини таъминлашга содиқликларини яна бир бор тасдиқладилар.
