Тошкент, Ўзбекистон — Тошкент шаҳрида Юнусобод тумани солиқ хизматида фаолият юритган икки нафар ходимга нисбатан тадбиркордан пул маблағи талаб қилганлик гумони билан жиноят иши қўзғатилди.
Давлат хавфсизлик хизмати маълумотига кўра, тезкор тадбирлар пойтахт бўйича ДХХ бошқармаси ходимлари томонидан Иқтисодий жиноятларга қарши курашиш департаменти билан ҳамкорликда ўтказилган. Текширув учун асос ДХХ колл-марказига келиб тушган мурожаат бўлган.
Идора маълумотларига кўра, солиқ инспекторлари ўзаро тил бириктириб, тадбиркордан 5 минг АҚШ доллари талаб қилган.
Ушбу маблағ эвазига улар тадбиркорнинг «Чилонзор буюм бозори комплекси» компаниясига тегишли учта савдо жойини ижарага бериш бўйича очиқ тендерда ғолиб бўлишини таъминлашни, шунингдек, зарур шартномаларни расмийлаштиришда ёрдам беришни ваъда қилган.
Солиқ хизмати ходимлари пул маблағларини олиш вақтида ушланган.
Ҳозирда мазкур ҳолат юзасидан жиноят иши қўзғатилган ва тергов ҳаракатлари олиб борилмоқда.
Ҳуқуқни муҳофаза қилувчи органлар ишнинг қўшимча тафсилотларини очиқламаган.