Тошкент, Ўзбекистон — 2026 йил биринчи чорагида Ўзбекистонда 45,2 минг нафар жисмоний шахс қуёш панеллари орқали ишлаб чиқарилган ва тармоққа узатилган электр энергияси учун давлат бюджетидан субсидия олди. Жами тўловлар ҳажми 73 млрд 982 млн сўмни ташкил этди.
Энг катта субсидия ҳажми Бухоро вилояти ҳиссасига тўғри келиб, у ерда тўловлар 16,5 млрд сўмни ташкил қилди. Хоразм вилоятида бу кўрсаткич 13,3 млрд сўмга, Қашқадарё вилоятида эса 9,1 млрд сўмга етди.
Субсидиялар 2023 йил 1 апрелдан амал қилаётган «Қуёшли хонадон» дастури доирасида тақдим этилмоқда. Унинг шартларига кўра, жисмоний шахслар томонидан ўрнатилган қуёш панелларида ишлаб чиқарилиб, ўз эҳтиёжидан ортиқ қисми ягона энергетика тизимига узатилган ҳар бир киловатт-соат электр энергияси учун давлат бюджетидан 1000 сўмдан тўланади.
Олинган маблағларни Soliq мобиль иловаси орқали банк картасига ўтказиш мумкин. Бунинг учун «Кешбэк ва имтиёзлар» бўлимидаги «Қуёшли хонадон» хизматида маблағни картага ўтказиш имконияти мавжуд.
Субсидиялаш механизми қайта тикланувчи энергия манбаларидан фойдаланишни рағбатлантириш ва аҳолининг электр энергияси ишлаб чиқаришдаги иштирокини кенгайтиришга қаратилган.
