Тошкент, Ўзбекистон — IT Park Uzbekistan ва Korea ICT Entrepreneurs Association Ўзбекистон ва Жанубий Корея ўртасида стартапларни қўллаб-қувватлашнинг янги форматлари ва технологик ҳамкорликни кенгайтириш масалаларини муҳокама қилди. Учрашув ICT WEEK Uzbekistan 2026 доирасида бўлиб ўтди.
Музокараларда IT Park Uzbekistan стартаплар экотизимини ривожлантириш бўйича директори Фаррух Эркинов ва Korea ICT Entrepreneurs Association раиси Ли Сон Хван иштирок этди. Томонлар акселерация ва инкубация дастурларини ривожлантириш, технологик компанияларни қўллаб-қувватлаш ҳамда икки мамлакатнинг ICT экотизимлари ўртасидаги алоқаларни мустаҳкамлаш масалаларини кўриб чиқди.
Ли Сон Хван Чхунчхон-Намдо провинциясида ўзбек стартаплари учун акселерация ва инкубация дастурини ташкил этишга тайёрлигини билдирди. Тахмин қилинишича, иштирокчилар Корея бозорини яхшироқ ўрганиши, маҳаллий экотизим билан танишиши ва эҳтимолий ҳамкорлар билан алоқалар ўрнатиши мумкин.
Ўз навбатида, Фаррух Эркинов 2027 йилдан ишга туширилиши режалаштирилаётган Land of Startups дастурини тақдим этди. IT Park Uzbekistan вакили Корея стартапларини, жумладан, Чхунчхон-Намдо провинциясидаги жамоаларни дастурда иштирок этишга таклиф қилди.
Бундан ташқари, учрашув иштирокчилари K-ICT тармоғига кирувчи компанияларни Ўзбекистонга жалб қилиш, ўзбек ва корейс технологик компаниялари ўртасида бизнес учрашувларини ташкил этиш, бизнес-миссиялар ўтказиш ва қўшма пилот лойиҳаларни амалга ошириш имкониятларини муҳокама қилди.
Korea ICT Entrepreneurs Association 400 га яқин ICT компаниясини бирлаштиради ҳамда технологик ҳамкорлик, бизнес нетворкинг, экспертлик тадбирлари ва халқаро бизнес-миссияларга ихтисослашган.
Учрашувда KP HUB Company бош директори Чун Мин Хван, INTER/KR Namseoul University директори Сок Хи Ли, шунингдек, Seoul Shinmun таҳририяти журналисти ва давлат бошқаруви соҳасидаги PhD Чон Ик Ли ҳам иштирок этди.
Музокаралар якунлари бўйича томонлар икки томонлама акселерация ва инкубация, стартапларни бозорларга олиб чиқиш ҳамда Ўзбекистон ва Жанубий Корея ўртасида технологик ҳамкорлик имкониятларини кенгайтириш бўйича мулоқотни давом эттиришга келишиб олди.