“Manchester Siti” bosh murabbiyi Pep Gvardiola “Real”ga qarshi uchrashuvdan keyin matbuot oldida jamoaning boshlang‘ich tarkibi, o‘yin rejasi va 0:3 hisobidagi mag‘lubiyat sabablari haqida atroflicha fikr bildirdi. Ispaniyalik mutaxassisning so‘zlaridan bir narsa aniq sezildi: o‘yin mazmuniga u to‘liq norozi emas, ammo natija qattiq “urdi” va javob bahsi oldidan imkoniyatlar ancha cheklanganini ham yashirmadi.
“Katta o‘zgarish bo‘lmadi”
Gvardiola avvalo start tarkibi haqidagi savollarga javob qaytardi. Uning ta’kidlashicha, bu safar unchalik katta o‘zgarishlar qilinmagan. “Nyukasl”ga qarshi bahsda rotatsiya ko‘proq bo‘lgan, bu o‘yinda esa so‘nggi turlarda maydonga tushib kelayotgan futbolchilarning aksariyati yana ishonch olgan.
“Yo‘q, unchalik katta o‘zgarishlar bo‘lmadi. “Nyukasl”ga qarshi o‘yinda o‘zgarishlar ko‘proq edi. So‘nggi uchrashuvlarda bu futbolchilarning aksariyati maydonga tushgan.”, – dedi Gvardiola.
Reja qanotlar orqali bosim qilish edi
Pepning aytishicha, u bu o‘yinda qanotlardan agressiv foydalanishni istagan, ayniqsa yakkama-yakka vaziyatlarda. U Jeremi Dokuning o‘yinini alohida maqtadi: Dok-u juda xavfli bo‘lgani, bir necha bor qanotdan “kesib kirib”, darvoza chizig‘igacha yetib borgani aytildi. Biroq o‘ng qanotda “Siti” biroz qiynalgan. Shuning uchun orqaga ochilib harakat qilishni Antuan Semeno va Niko O’Rayli orqali amalga oshirishga uringanini qayd etdi.
“Men qanotlar orqali agressiv o‘ynashni istadim, ayniqsa yakkama-yakka vaziyatlarda. Jeremi Dok-u juda ajoyib o‘ynadi. O‘ng qanotda esa biroz qiynaldik. Orqaga ochilib harakat qilishga urindik va buni Antuan Semeno hamda Niko O’Rayli bilan amalga oshirdik.”, – dedi Gvardiola.
Gvardiolaga ko‘ra, jamoa hujumga chiqdi, gol izladi, o‘yinni “ochib” ko‘rishga harakat qildi. Ammo birinchi bo‘limda “Real” uchta gol urdi — aynan shu yerda uchrashuvning asosiy burilishi bo‘ldi.
“Biz oxirigacha bordik, lekin zarbani berolmadik”
Murabbiy bir jihatni og‘riq bilan tilga oldi: “Siti” hujumning oxirgi qismigacha juda ko‘p borgan — bu hatto orzudek, dedi u. Biroq eng muhim nuqta yetishmadi: hal qiluvchi zarba, oxirgi qaror, Kurtuani jiddiy seyvga majbur qiladigan aniq zarba.
Uning ta’kidlashicha, “Real” birinchi goldan keyin ko‘p imkoniyat yaratmagan, ammo har kelganda samara ko‘rsatgan: ikkinchi kelish — ikkinchi gol, uchinchi kelish — uchinchi gol. Pep buni “juda qiyin” deb atadi va raqib sifati hamda samaradorligini yuqori baholadi.
Shu bilan birga, u “Real” keyinchalik taktikani ham o‘zgartirganini aytdi: himoyada besh nafar bilan o‘ynab, markazni zich qilib qo‘yishgan, barcha 11 futbolchi himoyaga qaytgan. Bunday vaziyatda qarshi hujumlar doim xavfli bo‘lishini u alohida ta’kidladi.
“Biz ko‘p marta hujumga chiqdik, gol urishni istadik. Ammo ular birinchi bo‘limda uch marta imkoniyatga ega bo‘lib, uchta gol urdi. Biz esa hujumning oxirgi qismigacha juda ko‘p bordik. Shuning uchun ular taktikani o‘zgartirib, himoyada besh nafar futbolchi bilan o‘ynay boshlashdi va markazni juda zich qilib qo‘yishdi.”, – dedi Gvardiola.
Chorak final haqida: “Imkoniyat katta emas, lekin harakat qilamiz”
Gvardiola jamoaning keyingi bosqichga chiqish imkoniyatini real baholadi: hozircha imkoniyat katta emas. Ammo u baribir kurashdan voz kechmasliklarini aytdi: “harakat qilamiz”, degan.
“Menimcha, o‘yin yomon emasdi, ancha yaxshi o‘tdi. Jeremi Dokuning yakka harakatlari orqali qancha marta darvoza chizig‘igacha yetib borganimizni bilmayman. Uzun uzatmalar va ikkinchi to‘plarda, ayniqsa Antuan Semeno va Niko O’Rayli orqali ham ko‘p imkoniyatlar yaratdik. Jarima maydoni ichida uch-to‘rt futbolchimiz turgan vaziyatlar bo‘ldi, lekin hatto Tibo Kurtuaga birorta jiddiy seyv qilish imkonini ham berolmadik.”
Endi tiklanish va keyingi o‘yinlar
Pepning so‘zlariga ko‘ra, hozir jamoa uchun eng muhim ish — ruhiy va jismoniy tiklanish. Chunki oldinda Londonda “Vest Xem”ga qarshi uchrashuv bor, Premer-ligada ham kurash hali tugamagan. Keyin esa “Etixad”da javob bahsi.
U muxlislar “Etixad”ni to‘ldirishini, futbolda esa hech qachon hamma narsa oldindan aniq bo‘lmasligini aytdi: balki jamoa biror yechim topar, balki raqibga qarshi to‘g‘ri yo‘lni topar.
“Hozir eng muhimi — biroz ruhiy va jismoniy tiklanish. Keyin Londonda “Vest Xem”ga qarshi o‘yin bor, bu ham oson bo‘lmaydi. Premer-ligada esa hali kurashda qolmoqdamiz.
Shundan keyin nima bo‘lishini ko‘ramiz. Muxlislarimiz albatta “Etixad”ga kelishadi. Futbolda esa hech qachon oldindan aniq aytib bo‘lmaydi — balki biz biror yechim toparmiz yoki ularga qarshi qanday o‘ynash kerakligini to‘g‘ri anglarmiz”.
“3:0 — 4:0dan yaxshiroq, lekin baribir og‘ir”
Gvardiola qattiq va rost gapni ham aytdi: 3:0 hisobidagi mag‘lubiyat 4:0dan yaxshiroq, lekin bu baribir og‘ir natija, bundan qochib bo‘lmaydi. Uning umumiy xulosasi shunday bo‘ldi: o‘yin mazmun jihatdan natijadan ko‘ra yaxshiroq ko‘rindi, ammo hisob — aynan shu.
Qisqasi, Pep o‘yindagi ba’zi ijobiy jihatlarni ko‘rdi: qanotdan kirishlar, ikkinchi to‘plar, jarima maydoniga kirib borishlar. Lekin “Real”ning samaradorligi va “Siti”ning oxirgi zarbadagi muammosi natijani keskin qilib qo‘ydi. Endi esa bir hafta vaqt bor — va “Etixad”da navbatdagi katta kecha.
Ma’lumot
Mehmon
guruhidagi foydalanuvchilar ushbu nashrga izoh qoldira olmaydi.
Yangiliklar
»
Sport
» Gvardiola tan oldi: natija og‘ir, ammo chorak finalga chiqishga umid bor
So’nggi yangiliklar
Hormuzni tark etmoqchi bo‘lgan tankerlar nishonga olinyapti
Bugun, 11:56
12 mart oltin quymalarning sotuv narxlari e'lon qilindi
Bugun, 11:40
"Qo‘qonlik tabib" Iqbol Soliyev Ozarboyjonda qo‘lga olindi
Bugun, 11:40