Тошкент, Ўзбекистон — Ўзбекистонда ўтган йил ва жорий йил бошидан буён 991 та дорихонада дори воситалари нархини асоссиз ошириш билан боғлиқ 414,3 минг ҳолат аниқланди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси матбуот хизмати хабар берди.
Қайд этилган қоидабузарликларнинг 152 таси улгуржи дорихоналарда, 839 таси эса чакана дорихоналарда содир бўлган. Текширувлар якунлари бўйича истеъмолчилар фойдасига қайта ҳисоб-китоб амалга оширилди, шунингдек уларнинг ҳуқуқларини тиклаш бўйича чоралар кўрилди.
Нархларни асоссиз ошириш натижасида олинган умумий ноқонуний даромад миқдори 8,5 млрд сўмни ташкил этди. Идорада таъкидланишича, қонунбузарликлар солиқ органлари тизими орқали аниқланиб, кейинчалик маълумотлар ягона Fair Tech ахборот тизимига узатилган.
Аниқланган қонунбузарликлар натижасида олти компаниянинг лицензияси бекор қилинди. Улар қаторида Farm Effekt, Pharma Brend, Gipofiz Farm, Maxsudbek Biznes, The Great Farm ва Medex Group Pharm бор.
Қўмитада таъкидланишича, фармацевтика бозорида нарх шаклланишини назорат қилиш истеъмолчилар ҳуқуқларини ҳимоя қилиш ва соҳада шаффофликни таъминлаш мақсадида давом эттирилади.
