Тошкент, Ўзбекистон — Халқаро меҳмонхона тармоқлари Hilton ва InterContinental Hotels Group Бухорода ўзининг илк меҳмонхоналарини очишни режалаштирмоқда. Айни пайтда шаҳарда Hilton Garden Inn ва Holiday Inn брендлари остидаги меҳмонхоналар, шунингдек, конгресс-холл қурилмоқда. Ушбу лойиҳаларга киритиладиган инвестицияларнинг умумий ҳажми 136,6 миллион долларни ташкил этади.
Ўзбекистон Президенти Шавкат Мирзиёев Бухоро вилоятига ишчи сафари доирасида мазкур объектларнинг қурилиш жараёни билан танишди. Бу ҳақда давлат раҳбарининг расмий веб-сайти хабар берди.
Hilton Garden Inn меҳмонхонаси 212 та хонага мўлжалланган. Унинг қурилишига киритиладиган инвестициялар 37 миллион долларга баҳоланмоқда. Етти қаватли бинонинг асосий конструкциялари аллақачон барпо этилган. Ҳозирда ички деворларни қуриш, муҳандислик коммуникацияларини ўтказиш ва фасадни пардозлаш ишлари олиб борилмоқда.
Яна бир етти қаватли, 212 хонали меҳмонхона InterContinental Hotels Group портфелига кирувчи Holiday Inn бренди остида фаолият юритади. Лойиҳанинг қиймати 39,6 миллион долларни ташкил этади. Меҳмонхона ёнида икки қаватли бизнес-марказ қурилмоқда. Айни пайтда унинг ер ости қисмида бетонлаш ишлари якунланиш арафасида.
Бундан ташқари, Бухорода умумий майдони 14,5 минг квадрат метр бўлган конгресс-холл барпо этилмоқда. Ушбу лойиҳага 60 миллион доллар инвестиция киритилади.
Объектда бетонлаш ишларининг асосий қисми якунланган. Ҳозирда ташқи муҳандислик коммуникацияларини ўтказиш, фасад ва том қисмини қуриш ишлари давом этмоқда.
Тақдим этилган маълумотларга кўра, Hilton Worldwide Holdings тармоғи ҳозирда Ўзбекистонда Тошкент ва Самарқанд шаҳарларида жойлашган 10 та меҳмонхонани бошқармоқда.
InterContinental Hotels Group эса мамлакатда Тошкент шаҳридаги битта меҳмонхона орқали тақдим этилган.
Янги лойиҳаларнинг амалга оширилиши халқаро меҳмонхона операторларининг Бухоро туристик секторидаги иштирокини кенгайтиришга хизмат қилади.