Тошкент, Ўзбекистон — Nvidia акциялари бир ҳафта давомида 4,34 фоизга арзонлашди, компаниянинг бозор капитализацияси эса қарийб 490 млрд долларга қисқарди. Бу ҳақда Yahoo Finance хабар берди.
Пайшанба куни чиплар ишлаб чиқарувчи компания акциялари 166,19 доллар даражасида савдони якунлади. Бир ҳафта давомида Nvidia капитализацияси 4,498 трлн доллардан 4,005 трлн долларга тушди.
Октябрь ойидаги 5,75 трлн долларлик чўққи кўрсаткичи билан таққослаганда, компания қарийб 1,75 трлн долларлик бозор қийматини йўқотди. Акциялар динамикасига нафақат Nvidia раҳбарияти атрофидаги вазият, балки сунъий интеллект соҳасининг истиқболларига нисбатан баҳоларнинг қайта кўриб чиқилиши ҳам таъсир кўрсатмоқда.
Натижада Nvidia дунёдаги энг йирик оммавий компаниялар орасидаги биринчи ўринни Apple компаниясига бўшатиб берди.
Nvidia акциялари пасайган бир пайтда технология секторидаги бошқа компаниялар акциялари турлича динамикани намоён этди. AMD акциялари қарийб 5 фоизга, Broadcom акциялари эса 5,54 фоизга қимматлашди.
Шу билан бирга, CoreWeave акциялари қарийб 6 фоизга, Nebius акциялари 16 фоизга, TSMC акциялари қарийб 2 фоизга, Intel акциялари эса тахминан 2 фоизга арзонлашди.
ASML, Micron, SK Hynix ва Sandisk акцияларида ҳам пасайиш кузатилди.
Инвесторлар учун ноаниқликнинг асосий омилларидан бири Nvidia компаниясидаги корпоратив бошқарув масаласи бўлиб қолмоқда. Шу билан бирга, компаниянинг ишлаб чиқариш бўйича ҳамкорлари, технологик базаси ва мижозлар инфратузилмаси сақланиб қолмоқда.
Бозор учун асосий савол — компаниянинг 30 йилдан ортиқ вақт давомида ривожланиш йўналишини белгилаб келган Женсен Хуангсиз Nvidia аввалги ўсиш суръатларини сақлаб қола оладими ва етакчилик мавқеини давом эттира оладими, деган масаладир.