Тошкент, Ўзбекистон — Тошкент халқаро аэропортида йирик миқдордаги олтинни хорижга ноқонуний олиб чиқишга уринишнинг олди олинди. Бу ҳақда Ўзбекистон Давлат хавфсизлик хизмати хабар қилди.
Ҳодиса ДХХ ҳамда “Тошкент-Аэро” ихтисослаштирилган божхона комплекси томонидан ўтказилган қўшма тезкор тадбир давомида аниқланган. Тошкент — Дубай рейси йўловчисининг юки текширилганда чемоданнинг ички қисмига металл пластиналар кўринишида яширилган олтин топилган.
Идора маълумотларига кўра, мусодара қилинган олтиннинг умумий оғирлиги 1 килограмм 923 граммни ташкил этган. Андижон вилоятида туғилган, Тошкент шаҳрида яшовчи 1980 йилда туғилган йўловчи қўлга олинган.
Кейинги текширувлар давомида ушбу ҳолатга 1992 йилда туғилган, Тошкент вилоятилик яна бир фуқаронинг алоқадорлиги аниқланган. У муқаддам Ўзбекистон Жиноят кодексининг 182-моддаси бўйича божхона қонунчилигини бузганлик учун судлангани маълум қилинди.
Мазкур ҳолат юзасидан терговга қадар текширув ҳаракатлари олиб борилмоқда.
