Fransiya chempionatining 14-turida “Lans” o‘z maydonida “Monpele” bilan kuch sinashib, muhim uchrashuvda 2:0 hisobida g‘alaba
qozondi
.
Bu 2024 yil hisobidan “Lans”ning chempionat doirasida o‘z uyidagi oxirgi uchrashuvi bo‘lgani uchun ham muxlislar uni alohida e’tibor bilan kuzatdi.
“Lans” butun uchrashuvda ustunlik qildi. Lekin bellashuvning kulminatsion nuqtasi 39-daqiqaga to‘g‘ri keldi.
Abduqodir Husanov boshlab bergan kombinatsiyani Remi Labo samarali yakunladi. Hisobda oldinga chiqib olgan lansliklar ancha xotirjam tortdi.
Mezbonlarning ikkinchi goli so‘nggi daqiqalarga to‘g‘ri keldi. Kevin Dansoning jarima zarbasi raqib himoyachilari uchun juda noqulay chiqdi. Rikoshetdan keyin to‘p darvozabon Benjamin Lekomtga tegib, darvozaga kirib ketdi – avtogol.
Bu g‘alabadan keyin “Lans” ochkolari sonini 23 taga yetkazib oldi. Garchi jamoa yettinchi pog‘onada joylashgan bo‘lsa-da, o‘zidan yuqorida joylashgan raqobatchilar bilan oradagi farq katta emas va “Lans” Yevrokuboklarga yo‘llanma beradigan o‘rinlar uchun kurashni davom ettirmoqda.
Ta’kidlash joizki, Abduqodir Husanov ikki o‘yinli diskvalifikatsiyani yakunlab, safga qaytganidan keyin “Lans” ketma-ket ikki bellashuvda o‘z darvozasi daxlsizligini saqlab kelmoqda. Abduqodir o‘ynamagan “Nant” va “Marsel”ga qarshi bahslarda Bris Samba o‘z darvozasidan beshta to‘p olib chiqqan edi.
“Monpelk”ga qarshi o‘tkazilgan uchrashuvdan keyin “Lans” bosh murabbiyi Uill Still jamoasi o‘yini haqida o‘z fikr-mulohazalarini bildirdi va uchrashuvning eng yaxshi o‘yinchisi bo‘lgan Abduqodir Husanovni alohida maqtadi.
–
Biz ikkinchi bo‘limni birinchisiga qaraganda sal bo‘shroq o‘tkazdik shekilli, yuzaga kelgan bir necha qulay vaziyatlardan foydalana olmadik.
O‘yinda o‘z xarakterimizni ko‘rsatish uchun katta kuch sarflashimizga to‘g‘ri keldi. Natijaga erishish uchun ancha harakat qildik.
Jamoamni ketma-ket ikkinchi uchrashuvda birorta ham gol o‘tkazmay, g‘alaba qozonayotganini e’tiborga olish kerak. Yangi tizim to‘liq ishlashi uchun vaqt va ko‘proq mehnat qilish kerak, hamma narsani bir soatda hal qilib bo‘lmaydi.
Ikkinchi bo‘limdagi bo‘sh o‘yinimizni zudlik bilan to‘g‘rilashimiz kerak, biz bu holatni yaxshi tushunib turibmiz.
Abduqodir Husanov masalasiga kelsak, bu o‘yinchidan hozir qanday bo‘lsa, kelajakda ham shunday qolishini so‘ragan bo‘lardim.
U o‘ta noyob qobiliyat egasi, har bir uchrashuvda unga berilgan ko‘rsatmalarimizni aniq va to‘liq bajarib kelmoqda.
Husanov juda tezkor, jismonan baquvvat, to‘pni juda yaxshi boshqaradi. Bu juda zo‘r holat
, – dedi Uill Still.
Eslatib o‘tamiz, Abduqodir Husanov 2023 yilning yozidan beri “Lans” o‘yinchisi hisoblanadi. Ayni paytda mavsum kashfiyotiga aylangan legionerimizga Yevropaning Angliya, Fransiya, Italiya, Ispaniya, Germaniya singari eng kuchli ligalaridan o‘ndan ziyod nomdor klublari jiddiy qiziqish bildirmoqda.
Mavzuga oid yangiliklar